Специјален едукативен камп за планинарење за деца со попречености до планинарскиот дом „Троуглеш“

Охрид, 23. јуни 2024 (ОХРИДПРЕС) – Здружението на планинари „Великамен“ од охридското село Елшани вчера одржа Специјален едукативен камп за планинарење за деца со попречености.

Настанот започна со кратка планинарска акција од селото Горно Коњско до планинарскиот дом „Троуглеш“.

– Децата беа придружувани од двајца лиценцирани водичи, дефектолог и нивните родители. Во дворот на домот преку активности децата учеа како се поставува шатор, како безбедно да се запали логорски оган и многу други вештини за движење и престој на планина, информира Павел Донески во име на организаторите.

Додава дека специјалниот едукативен камп за планинарење за деца со попречености како настан е уште една успешна соработка помеѓу Здружението на планинари „Великамен“ и Здружението на родители на деца со посебни потреби „Тајните на моето срце“.

Настанот беше поддржан од програмата за здравствена и социјална заштита на Општина Охрид. (Крај)

извор: Павел Донески фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука