Календар на МПЦ-ОА: Пренос на моштите на светите маченици Кир и Јован

Охрид, 11. јули 2024 (ОХРИДПРЕС) – Православните христијани денес го слават денот посветен на преносот на моштите на светите маченици Кир и Јован.

Се празнуваат на 31-ви јануари. Под тој датум е опишано нивното житие и страдање. На 28-ми јуни се празнува преносот на нивните мошти од Канопос во Манутин и многубројните чуда што се случија притоа.

Александрискиот патријарх свети Кирил истрајно се молеше на Бога да го уништи идолското нечестие во Манутин, кај што имаше идолски храм и владееше демонска сила. Тогаш на патријархот му се јави Ангел Божји и му рече дека Манутин ќе биде очистен од нечестието ако тој ги пренесе таму моштите на светите Кир и Јован.

Патријархот веднаш го направи тоа: ги пренесе чесните мошти на мачениците во Манутин и изгради таму црква, којашто им ја посвети на светите Кир и Јован. Од моштите на овие маченици се исцели од шкрофул Амониј, синот на александрискиот градоначалник Јулијан; некој Теодор од слепило; Исидор од Мајум се исцели од раскапување на црниот дроб; една жена Теодора од отруеност; некој Евгениј од водена болест.

Сето тоа се случи во 412 година.

Тропар

Чудата извршени од Твоите свети маченици, Христе Боже, за нас се покажаа карпа несоборлива. По нивните молитви, намерите на противниците разруши ги, народот заштити го, зашто си Единствен благ и Човекољубив. (Крај)

извор: mpc.org.mk фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука