Левица: Во Струга, на само 20 метри од езерото се гради нелегален објект

Струга, 6. јули 2024 (ОХРИДПРЕС) – Продолжува уништувањето на крајбрежјето на Струга, каде што узурпацијата на државното земјиште не само што е дозволена, туку и активно се игнорира од надлежните институции. Последниот случај, каде на само 20 метри од Охридското Eзеро се гради нелегален објект, е уште еден доказ за системската корупција и неказнивоста во Република Македонија, порачуваат од партијата Левица.

– Граѓаните на Струга со право се загрижени и гневни поради ваквата екокатастрофа. Нивниот страв дека ќе се повтори сценариото со „Аполонија“, кога нелегално изграден објект функционира како угостителски локал, е оправдан. Тампонирањето на трската и уништувањето на природата претставува, очигледно, и флагрантно прекршување на Законот за животната средина. Локалното население подолго време алармира за ваквите незаконски активности, но овие повици за почитување на законите и заштита на природното наследство се игнорираат. Државниот инспекторат за животна средина, и покрај Извештајот и Кривичната пријава поднесена пред три години, не презема мерки за санкционирање на виновниците, потенцираат од партијата.

Левица остро го осудува незаинтересираниот и корумпиран однос на институциите и бара итни мерки за заштита на крајбрежјето на Охридското Езеро:

• Итно запирање на сите градежни активности и узурпации на државното земјиште на крајбрежјето;

• Санкционирање на одговорните лица и фирми за нелегалната градба и уништување на природата;

• Спроведување на планот за управување со природното и културното наследство во Охридскиот регион;

• Засилени инспекции и редовни контроли за спречување на идни незаконски активности.

– Природното богатство на Охридското Езеро е од непроценлива вредност за Македонија и за светот! Неговото уништување е недозволиво и претставува еко-криминал кој не смее да помине неказнет. Стоиме на страната на граѓаните и еколошките активисти и ќе продолжи да се бори за заштита на нашето природно и културно наследство, потенцираат од партијата Левица. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука