Затворски и парични казни во случајот „Синџир“, вмешани фирми и од Охрид

Скопје/Охрид, 10. јули 2024 (ОХРИДПРЕС) – Петмина обвинети во случајот „Синџир“ вчера добија затворски казни откако се изјаснија за виновни по обвиненијата, вклучително и злосторничко здружување, перење пари и даночно затајување. Само еден обвинет доби условна казна, кој веќе започна со отплата на долгови.

Првообвинетиот Сашо Вучков е осуден на 2 и пол години затвор и парична казна од 2.000 евра. Неговиот татко доби двегодишна затворска казна и 1.000 евра парична казна, додека Велика Вучкова, неговата мајка е осудена на 1 година и 11 месеци затвор со парична казна од 1.000 евра. Двајца други обвинети добија по две години затвор, заедно со парични казни од 1.000 евра. Имено, на еден обвинет му е изречена условна казна поради нивна иницијатива за отплата на долгот.

Исто така, судот им го продолжи притворот на тројца обвинети, на двајца им одреди куќен притвор, а на друг им примени мерки на претпазливост. Дополнително, изречени се парични казни за шест компании чии претставници исто така ја признаа вината, како и забрани за учество на јавни повици и концесии.

Случајот „Синџир“ вклучува над триесет лица и ентитети обвинети за смислување мрежа за избегнување данок, во износ од приближно 8 милиони евра. Најмногу вмешани фирми се од Неготино, Охрид, Демир Капија и Битола. Во тек е правна постапка за останатите 11 обвинети кои се изјаснија за невини. (Крај)

извор: Lider.mk фото: Lider.mk

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука