Амбасадорот на Словенија Прескер во посета на Општина Охрид

Охрид, 12. јули 2024 (ОХРИДПРЕС) – Амбасадорот на Република Словенија Грегор Прескер во придружба на Почесниот словенечки конзул со седиште во Охрид, Шенол Ислам беше во прва официјална посета на Општина Охрид.

На работната средба се разгледуваа можностите, проекти на локалната власт од областа на екологијата, животната средина и водоснабдувањето да бидат поддржани од словенечката влада со аплицирање на меѓународни тендери.

Двете страни изразија согласност за воведување дирекни авионски линии Охрид-Љубљана особено во летниот период од годината со намера да се зголеми бројот на туристи во двете земји.

Амбасадорот Прескер беше информиран за добрата соработка меѓу локалната и централната власт и поддршката што општината ја добива на годишно ниво за реализирање на предвидените проекти.

Високиот гостин од Словенија го изрази своето воодушевување од убавините на Охрид кој долги години е заштитен од УНЕСКО поради својата природна и културна реткост и посочи дека ќе се заложи за зацврстување на пријателските односи меѓу двете земји. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука