Одличните Foltin на 8-ми август на Drim Short Film Festival
Струга, 22. јули 2024 (ОХРИДПРЕС) – Во четврток, на 8-ми август 2024 година, во рамките на фестивалот за краток филм Drim Short Film Festival ќе се одржи концерт на одличните Foltin.
Foltin е македонски бенд, активен од 1995 година, чија музика е тешко да се дефинира, звучи непредвидливо и предизвикувачки, надреално, страсно и духовито, динамично и полно со изненадувања, спојувајќи многу жанрови како инди, алтернатива, светска музика, фанк, електро-акустична, џез и други влијанија.
Нивната музика е свежа, топла, бескрајно имагинативна и има моќ да ги натера луѓето да се чувствуваат прегрнати и воздигнати. Настапите во живо на Foltin се театарски и во кабаре стил, карактеризирани со избезумена танцова атмосфера. Работеле на театарска и филмска музика многу пати.
Текстовите на првите три албуми на бендот се мешавина од фонетски имитации на јазици, вклучувајќи шпански, француски, романски и португалски. Бендот се појавил на музички и театарски фестивали во Македонија, Хрватска, Италија, Австрија, Словенија, Србија, Босна и Херцеговина, Црна Гора, Албанија, Бугарија, Унгарија, Белгија, Англија, Германија, Русија, Либан, Турција, Холандија и Франција.
Билетите за настапот на групата се продаваат по цена од 300 денари, а концертот ќе се одржи на Летната сцена при Центарот за култура „Браќа Миладиновци“ во Струга со почеток во 22:00 часот. (Крај)
извор: ОхридПрес фото: архива
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
