Охриѓанката Емилија Николовска освои бронзен медал на 54. Меѓународна олимпијада по физика во Исфахан, Иран

Исфахан/Охрид, 28. јули 2024 (ОХРИДПРЕС) – Охриѓанката Емилија Николовска освои бронзен медал на 54. Меѓународна олимпијада по физика во Исфахан, Иран каде денес се одржа завршната церемонија за доделување на медалите и наградите на најуспешните учесници.

Овогодинешните наши преставници го забележаа најголемиот успех од почетокот на учеството на учениците од Македонија на оваа олимпијада во 1996 година, освојувајќи сребрен медал, два бронзени медали и една награда за успешно учество (пофалница).

– Јан Стојановски, ученик во четврта година во ПСУ „Јахја Кемал“ од Скопје, за прв пат на Мекедонија и донесе сребрен медал од оваа олимпијада, само 7 дена по освојувањето на Златниот медал на 8. Европска Олимпијада по физика. Бронзени медали освоија Емилија Николовска, ученичка во четврта година во Математичко – информатичка гимназија во Скопје и Андреј Стојановски, ученик во трета година во ПСУ „Јахја Кемал“ во Скопје. Награда за успешно учество освои Матеа Митревска, ученичка во трета година во ПСУ „Јахја Кемал“ од Скопје. Своето знаење на оваа олимпијада го покажа и Дамјан Стојанов, ученик во трета година во ПСУ „Јахја Кемал“- Скопје. Водачи на тимот беа проф. д-р Ламбе Барандовски, вонреден професор на ПМФ во Скопје и Претседател на Друштвото на физичарите на Република Македонија и Војо Митревски, апсолвент на Институтот за физика при ПМФ во Скопје и поранешен олимпиец, информираат од Друштвото на физичарите на Република Македонија (ДФРМ).

На 54. Меѓународна олимпијада по физика учествуваа 197 ученици од 46 држави од светот. ДФРМ за македонските олимпијци организираше 4 неделни подготовки кои се одржаа во периодот јуни – јули 2024 година на Институтот за физика при Природно – математичкиот факултет во Скопје. (Крај)

извор: ОхридПрес фото: ДФРМ

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука