Скопје/Охрид, 12. август 2024 (ОХРИДПРЕС) – Изложба на дела на младата и супер-талентирана охриѓанка Ева Китрозоска ќе биде претставена на третата Глобална женска лидерска конференција во Република Македонија „Јас Сум Жена“.

Ќе се одржи на 31-ви август и 1. септември 2024 година во хотел „Континентал“ во Скопје, во организација на Здружението за вмрежување на жени, едуцирање и истражување „Јас Сум Жена“.

– Чест нѝ е да го прикажеме неверојатниот талент на Ева, визионерски уметник која ја доловува суштината на жената во нејзините прекрасни портрети. Работата на Ева оди подалеку од самото претставување на лица. Таа навлегува во духот, силата и убавината што ја дефинираат секоја жена што ја црта. Додека во живо ќе бидете сведоци на нејзината уметност како се развива, ќе видите повеќе од само линии; ќе видите приказни за издржливост, страст и уникатните патувања што ги поминала секоја жена. Портретите на Ева се прослава на различноста и индивидуалноста, потсетник дека секоја жена во себе носи приказна вредна за раскажување, порачуваат организаторите.

Конференцијата ќе биде отворена со изложба на рачни изработки на занаетчики и ликовна изложба со портрети од панелистките.

Темите кои ќе бидат опфатени на конференцијата се поделени во четири области и тоа: Македонки во здравство, Македонки во спорт, Македонки во нетипични професии и Македонки во светот. Во склоп на конференцијата, ќе се одржи и работилница „Едукативни Инфлуенсери“ и инспиративен разговор „Успешна Македонска Приказна“. (Крај)

извор: ОхридПрес фото: архива