Советниците усвоија 98 од вкупно 99 точки на Дневен ред на 44-та седница на Советот
Охрид, 29. август 2024 (ОХРИДПРЕС) – Со усвојување на 98 од вкупно 99 точки од Дневниот ред заврши 44-та седница на Советот на Општина Охрид.
Беа усвоени Предлог-одлуките за престанок на мандатите на советниците Горан Стојаноски и Горан Маркоски, а се верифицираа мандатите на Игор Јовески и Цветлана Вељаноска.
Зелено светло добија и Предлог-одлуките кои се однесуваа на Програмите за изведување училишни екскурзии како и за формирање паралелки со помалку од 20 односно 25 ученици во основните и средни училишта во градов. Беа усвоени и годишните извештаи и програми за работа на сите образовни институции во градов и селата, на ОЈУ „Кузман Шапкарев“ и на ЈОУДГ „Јасна Ристеска“ за учебната 2023/24 и 2024/2025 година. Се утврди и работното време како и формирањето поголеми или помали групи за работа во детската градинка „Јасна Ристеска“.
На Седницата беа усвоени Предлог-одлуките за извештаите за работа на сите охридски јавни претпријатија како и плановите за вработување во нив како и Годишниот план за вработување во Општина Охрид за 2025 година.
Советниците ги изгласаа и точките од дневен ред кои се однесуваа на Секторот ТЛЕР како и од делот на урбанистичката сфера.
Единствено не беше изгласана Предлог-одлуката за усвојување на Извештајот за состојбата во областа на јавната безбедност и безбедноста на сообраќајот на патиштата за период од први јануари до 30-ти јуни 2024 година. (Крај)
извор: ОхридПрес фото: ОхридПрес
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
