Скопје/Охрид, 2. септември 2024 (ОХРИДПРЕС) – Според најновиот извештај на Институтот за јавно здравје (ИЈЗ), објавен попладнево, во периодот од 26-ти август до 1. септември, тестирани се вкупно 379 материјали во лабораториите каде се спроведува молекуларно тестирање и антигенско тестирање за присуство на SARS-CoV-2, регистрирани сe 131 нов позитивен случај, со намалување од 38,5 отсто во однос на минатата недела.
Според истиот извор, најголем дел од регистрираните случаи се од Скопје – 67, по што следуваат Охрид со 15, Тетово со 11 и од Кавадарци со десет.
Регистрирани се заболени лица во сите возрасни групи, со најголем број случаи пријавени во возрасната група над 60 години. Со статус „оздравени“ се стекнале 194 лица.
– Во текот на минатата недела, не се пријавени починати лица асоцирани со Covid-19, се наведува во извештајот на ИЈЗ.
Податоците покажуваат дека од појавата на првиот случај на Covid-19 во државава, на 26-ти февруари 2020 година, а заклучно со вчерашниот ден, пријавени се вкупно 351.708 заболени и 9.995 починати лица асоцирани со коронавирус. Најголем дел од заболените се регистрирани во Скопје, Битола и Куманово, а највисок морбидитет е регистриран во Кавадарци. Највисок морталитет се регистрира во Охрид, Кавадарци и Прилеп. Највисок леталитет се регистрира во Струга и Крива Паланка.
Во текот на 2024 година, регистрирани се вкупно 1.392 заболени и 16 починати лица асоцирани со коронавирус.
– Се препорачува следење на основните мерки за превенција на Covid-19 и останати респираторни заразни заболувања. Вакцинацијата останува специфична превентивна мерка обезбедувајќи заштита од тешки форми на болест, иако овој заштитен ефект, со тек на време се намалува. Продолжува препораката за вакцинацијата на лицата со висок ризик од тешки форми на болест и лош исход – како што се повозрасните лица, се додава во извештајот на Институтот. (Крај)
извор: ИЈЗ/МИА фото: ОхридПрес
