Денеска истекува рокот за пријавување на Меѓународниот стрелачки турнир „Grand Prix 2024“

Охрид, 11. септември 2024 (ОХРИДПРЕС) – Женскиот стрелачки клуб „Лихнидос“ по вторпат е организатор на Меѓународниот турнир „Grand Prix 2024“, под покровителство на Општина Охрид и Македонската спортска стрелачка федерација.

Турнирот ќе се одржи на 15-ти септември на стрелиштето „Бејбунар“ во Охрид, а учесниците ќе се натпреваруваат во спортско стрелаштво со огнено оружје – пиштол и револвер, како и малокалибарска пушка со оптички нишан на 50 и 100 метри.

– Целта ни е продолжување на туристичката сезона, промоција и презентација на градот и збогатување со нова содржина, со што би се привлекле повеќе гости како од државата така и од регионов. Ги покануваме нашите активни членови, рекреативци, пријатели и љубители на спортското стрелаштво да земат учество на турнирот, велат организаторите.

Котизацијата за една дисциплина ќе изнесува 500 денари, а за секоја наредна 300 денари. Еден натпреварувач може да се натпреварува во сите 4 дисциплини со уплата од 1.400 денари. Заинтересираните може да се пријават на e-mail адресата sklihnidos@yahoo.com најдоцна до среда, 11-ти септември 2024 година, а право на учество ќе имаат сите учесници кои ќе уплатат котизацијата на жиро сметка 250 000 301 790 391, Шпаркасе банка Охрид, најдоцна до 13-ти септември 2024 година, до 14:00 часот.

Организаторите со напомена за сите учесници да ги почитуваат правилата за безбедно ракување и користење на оружјето, да носат заштитни очила и антифони, а секое непрописно однесување и непочитување на одредбите, како и безбедноста во ракувањето со оружјето ќе биде санкционирано со дисквалификација. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука