Дамјан Давков освои сребрo на Олимпијадата по информатика во Египет, во септември се подготвува Балканската олимпијада во Охрид

Скопје, 7. септември 2024 (ОХРИДПРЕС) – Чудото од дете Дамјан Давков освои сребрен медал на Светската олимпијада по информатика што се одржува во Александрија, Египет. Еден од најталентираните средношколци во Република Македонија, кој два пати по ред освои злато на Светската олимпијада по математика, за малку не го освои врвното одличје и на овој натпревар.

– Дамјан беше многу блиску и до освојување на златен медал, а од ова извонредно достигнување го делеа само 9 поени, од можните 600 поени на натпреварот. Исто така, нашиот Благој Рујаноски Стојановски освои олимписка пофалница, велат од Здружението на информатичарите на Република Македонија (ЗИМ), кои го организираат учеството на македонската репрезентација, јави порталот umno.mk.

36. Интернационална олимпијада по информатика (ИОИ 2024) се одржува од 1. до 8-ми септември. Македонскиот тим на најпрестижниот светски годишен натпревар од областа на програмирањето за средношколци го сочинуваат Дамјан Давков од Штип, Благој Рујаноски Стојановски од Прилеп, Виктор Максимоски од Гостивар и Софија Велковска од Скопје, предводени од лидерите, д-р Миле Јованов и д-р Емил Станков од Факултетот за информатички науки и компјутерско инженерство (ФИНКИ).

Нашиот тим за годинешната ИОИ беше избран преку целогодишен циклус натпревари, којшто редовно се организира ЗИМ. На светската олимпијада годинава учествуваа 370 ученици од 96 земји од целиот свет. Ова е најпрестижниот годишен интернационален натпревар во програмирање за средношколци кој традиционално се одржува во една од земјите членки на ИОИ заедницата. На овој натпревар учествуваат одбрани талентирани средношколци од целиот свет, кои натпреварувајќи се ги изоструваат своите информатички вештини, како што се анализа на проблеми, дизајн на алгоритми и податочни структури, програмирање и тестирање. Секоја година, во повеќе од 90 држави од светот се организираат национални натпревари во програмирање, на кои што учествуваат вкупно повеќе од 400.000 ученици, сите со единствен мотив – да се изборат за големата чест и привилегија да ја претставуваат својата држава на ИОИ.

– Радосен сум од успехот на нашите ученици, кои се вистински амбасадори на нашата земја. Овој успех се должи на интензивна работа на повеќе волонтери вклучени во работата на Здружението, а можноста за учество на натпреварите ни ја дава поддршката од нашите поддржувачи, Факултетот за информатички науки и компјутерско инженерство (ФИНКИ) и неколку општествено одговорни компании како Sorsix, Netcetera, Codecham и Loka. Со ваков млад тим, ученици кои имаат право и следните години да учествуваат на ИОИ, можеме да очекуваме дека следната година ќе имаме уште поголеми резултати, и уште еднаш ќе испишеме историја за Македонија, вели проф. д-р Миле Јованов, претседател на ЗИМ.

Следната, 37. Интернационална олимпијада по информатика (ИОИ 2025), ќе се одржи во Боливија. Следен настан пак, кој им претстои на нашите информатичари, е Балканската олимпијада по информатика (БОИ), чиј домаќин ќе биде Македонија, а ќе се одржи од 20-ти до 26-ти септември во Охрид. Здружението на информатичари на Македонија ќе биде домаќин на повеќе од 100 учесници од 15 различни земји и за таа цел подготовките се во тек, а се’ уште е активен и повикот за спонзорства од македонските компании. (Крај)

извор: umno.mk фото: umno.mk

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука