Ведерфорд/Охрид, 5. октомври 2024 (ОХРИДПРЕС) – Голем чекор за еден висок играч. Климентина Модева е највисоката спортистка во историјата на женската кошарка на Weatherford колеџот во Тексас, САД која носи меѓународно искуство и силна работна етика во тимот.
Вака порталот wcathletics.com, посветен на женската кошарка во САД го започнува интервјуто со охриѓанката Климентина Модева, младата дама која направи голем чекор во својата кошаркарска кариера кога од Република Македонија дојде во САД. Сепак, како највисока спортистка што некогаш играла за Weatherford College Lady Coyotes, големите чекори како да одат и со нејзината висина, која е 205 сантиметри.
Таа е секако највисокиот играч во кариерата на Bob McKinley, кој речиси пет децении работи како тренер на Lady Coyotes.
– Таа ќе биде највисокиот играч на нашата конференција. И нејзиниот став е фантастичен. Таа има одличен однос со сите во тимот, вели тренерот McKinley.
Модева вели дека секогаш била повисока од другите девојки, но на почетокот на нејзините тинејџерски години разликата станала уште поголема.
– Имав скок на растот кога имав 14 години, а таа година пораснав повеќе од 15 сантиметри, вели Климентина и додава дека ќе се труди максимално и ќе игра напорно за тимот.
Модева претходно играше за репрезентацијата на Република Македонија од 16 до 18 години, а беше член и на тимот на ЖКК „Струга 2009“ во Првата лига на Република Македонија, истиот тим за кој настапуваше и нејзината сестра Габриела.
Модева вели дека таа никогаш порано не слушнала за Weatherford, но смета дека е фасцинантно место.
– Иако е различно, многу ми се допаѓаат Тексас и Weatherford. Ми недостигаат моето семејство и пријателите. Ја сакам кошарката и како се игра овде, вели Модева.
Таа моментално ги завршува општите студии, а планира подоцна да се фокусира на сајбер безбедноста.
– Навистина сакам кодирање и компјутери, рече таа.
Во меѓувреме, ужива да стекнува нови пријатели и да го игра спортот што толку многу го сака. И, ако напредува во американската игра како што очекува тренерот McKinley, таа би можела да им помогне на Lady Coyotes да постигнат највисоки резултати. (Крај)
извор: wcathletics.com фото: wcathletics.com
