Охрид, 15. октомври 2024 (ОХРИДПРЕС) – На денешен ден во 2007 година, македонскиот музички ангел Тоше Проески го имаше последното интервју за емисијата „Вртелешка“ со Весна Петрушевска и Васил Зафирчев на Канал 5 телевизија.
Иако секогаш важеше за весел и позитивен човек, Тоше во текот на разговорот е видно нерасположен, уморен и раскажува како тешко се носи со славата.
На прашањето на водителката дали сака да се тргне од се’, тој одговара:
– Сакам ама не можам. Машинеријата ме стави, како велат, во барабан и готово. Нема враќање. Барам опоравување од секојдневните интервјуа, шминкања, тргнување на шминка, пакувања. Патувања во Загреб, па назад, патување во Австралија… Од се’ ми е овде, кажа тој и додаде:
– Правам грешки како секој нормален човек секојдневно. Не сум безгрешен, светец, ниту ангел, далеку сум од тоа, но сум далеку и од грозните приказни кои ми се препишуваат откако сум познат.
Раскажуваше за своите родители како големи животни примери. Интервјуто можете да го погледнете овде.
На 5-ти октомври 2007 година Тоше го одржа последниот концерт, на Градски стадион во Скопје, само 11 дена пред трагичната сообраќајна незгода во која го изгуби животот. Концертот беше со хуманитарен карактер, а целата собрана сума беше за реновирање на стотина училишта ширум Република Македонија.
– Чест ми е што сум дел од проект од вакви размери и од големи планови за македонското образование. Сите концерти ми се драги, но хуманитарните многу ми значат оти остануваат трајно. Ако се подобри образованието во Македонија, ќе имаме поздраво општество, изјави тогаш Тоше.
Гости на концертот беа Адријан Гаџа, Бојан Маровиќ и Антонија Шола.
– Сликајте ме со ѕвезденото небо, ѝ се обрати Тоше на публиката кога илјадници мобилни телефони и запалки светнаа на неговите романтични рефрени.
Утрото на 16-ти октомври на автопатот Липовац-Загреб, кај местото Нова Градишка во Хрватска, Тоше Проески загина во сообраќајна несреќа на само 26 години, ставајќи крај на една кариера која допрва требаше да блесне во светски рамки. (Крај)
извор: 4news.mk фото: архива видео: trtmrtfrt
