Охрид, 9. ноември 2024 (ОХРИДПРЕС) – Тиквата заслужува посебно место во нашата исхрана во текот на целата година. Американскиот Центар за контрола и превенција на болести ја стави високо на скалата според хранливата вредност кај овошјето и зеленчукот, а дополнително е извор и на бројни корисни состојки.

Полна е со антиоксиданси, особено со бета-каротин, кој ги уништува слободните радикали и се бори против воспаленијата кои можат сериозно да го нарушат нашето здравје. Исто така, тиквата е богата и со влакна кои го стабилизираат нивото на шеќер во крвта, го регулираат варењето и ја хранат цревната микробиота.

Покрај тоа, содржи витамини А, Ц и Е, неопходни за зајакнување на имунитетот, што е особено важно во текот на зимските месеци. Антиоксидансите и полифенолите, присутни во тиквата, делуваат против оксидативниот стрес, кој може да помогне во спречување на разни болести, вклучувајќи дијабетес, рак и кардиоваскуларни проблеми.

Семките од тиква се вистинско богатство

Семките од тиква се исто така вистинско богатство, богати се со незаситени масни киселини, како што се линолната и олеинската киселина, кои можат да помогнат во намалување на лошиот холестерол и да го заштитат срцето. Бета-каротенот од тиквата, исто така, придонесува за здравјето на очите и може да го намали ризикот од проблеми со видот во староста.

Влакната во тиквата го забавуваат влегувањето на шеќерот во крвотокот, спречувајќи нагли скокови на шеќерот во крвта, што е особено корисно за луѓето со дијабетес или оние кои сакаат да одржуваат стабилно ниво на енергија во текот на денот. (Крај)

извор: index.hr фото: index.hr