Охрид, 19. ноември 2024 (ОХРИДПРЕС) – Православните христијани го прославуваат денешниот ден во чест на Свети Павле Исповедник, патријарх Цариградски.

Кога блажениот патријарх Александар лежеше на смртна постела, ужалените верни го прашуваа кого го остава зад себе за архипастир на словесното стадо Христово. Болниот патријарх им рече: „Ако сакате да имате патријарх којшто ќе ве учи и ќе ви блеска со добродетел, изберете го Павле, а ако сакате да имате само убав човек и само однадвор украсен, изберете го Македониј“.

Народот го избра Павле. Но, ова не им беше право на аријанските еретици ниту на царот Констанциј, којшто во тоа време беше во Антиохија. И наскоро го симнаа Павле и тој заедно со свети Атанасиј Велики побегна во Рим, каде што обајцата беа добро примени од папата Јулиј и од царот Констанс, коишто ги поддржаа во нивната православна вера.

На писмо од царот Констанс и папата Јулиј, Павле го вратија на престолот, но кога умре овој цар аријанците кренаа глава и го протераа православниот патријарх во Кукуз во Ерменија. Во прогонство, свети Павле еднаш служејќи литургија беше нападнат од аријанците и удавен со омофорот, во 351 година. Во времето на царот Теодосиј неговите мошти во 381 година беа пренесени во Цариград, а во 1236 година во Венеција, каде што се наоѓаат и денес.

Неговите омилени клирици и секретари Маркијан и Мартириј пострадаа наскоро после својот патријарх (се слават на 25-ти октомври).

Тропар

Со исповедувањето на божествената вера, Црквата те покажа како втор Павле, ревнител меѓу свештениците: со тебе повикува и Авел кон Господа, и Захариевата крв праведна. Отче преподобен, моли Го Христа Бога, да ни дарува милост голема. (Крај)

извор: mpc.org.mk фото: архива