Охрид, 15. август 2017 (ОХРИДПРЕС) – Православните верници денеска го слават откривањето и преносот на моштите на Св. првомаченик и архиѓакон Стефан.

По повод празникот во пештерната црква „Св.Стефан” во Охрид синоќа се служеше празнична вечерна богослужба, а утринава света литургија.

Бројни верници ја посетуваат единствена црква посветена на овој светител во земјава, која претставува и главна манастирска црква на истоимениот манастир. Тие дојдоа да запалат свеќа и да му се помолат за здравје и среќа на Свети Стефан.

Малечката полуоблесто соѕидана црква во шуплината на карпата, постоела и порано, но дури во времето на процутот на уметничката дејност во XV век добила фреско-живопис.
Црквата сега има реконструиран надворешен дел, со нова камбанарија и нови конаци, кои на верниците и туристите им пружаат неповторлив душевен мир и прекрасен поглед на градот Охрид и езерото.

За свети архиѓакон Стефан не се знаеше ништо по неговата смрт со каменување во Ерусалим. Дури во петтиот век на Кафаргамалскиот епископ Лукијан во сон му се јави Гамалил, учителот на апостол Павле, и му го откри местото на кое почиваа неговите мошти, како и начинот на кој тие стасале дотаму. Имено, по убиството на свети Стефан, јудејците оставија неговото тело да го изедат пците, така што се до овој век тие беа сосема заборавени. Епископот Лукијан дојде до пештерата што му беше покажана и таму најде се според кажаното. А кога почнаа да копаат по пештерата се рашири пријатен и добар мирис од светите мошти. Подоцна моштите на свети Стефан беа пренесени во Цариград.

Во некои делови овој светец се нарекува и Стефан Ветровит поради што луѓето се плашат од него и го почитуваат за ветерот да не им го оддува сеното, сламата и да не донесе разни болести. Затоа се верува дека на денешен ден треба да се чуваме од ветрови. Морепловците денешниот ден го сметаат за празник бидејќи Свети Стефан им дава ветер за нивните едра. (Крај)

извор: МПЦ/ОхридПрес фото: fb/manastir sv.stefan