Охрид, 11. октомври 2017 (ОХРИДПРЕС) – Денеска се одбележува Денот на востанието на македонскиот народ – 11-ти октомври, навршуваат 76 години од почетокот на антифашистичкото востание и народноослободителната војна.

На денешен ден во 1941 година, борците од Првиот прилепски партизански одред го нападнаа бугарскиот полициски участок и телефонско-телеграфската мрежа во Прилеп, што го означи почетокот на организираното востание на македонскиот народ против бугарскиот, италијанскиот и германскиот окупатор за ослободување на земјата. Следниот ден, на 12-ти октомври, слична акција изведоа и партизаните од Кумановскиот одред.

Празникот 11 Октомври е продолжување на слободарските традиции на македонскиот народ проникнати во Карпошовото, Разловечкото, во Кресненското и во Илинденското востание, но и во напорите за социјално и национално ослободување вложени во Балканските војни и во Првата светска војна.

Во Втората светска војна Македонија беше на победничката страна, која беше платена со крв.

Да се запамети и да не се заборави, за никогаш да не се повтори загинувањето на многу борци кои го дадоа животот за слободата на татковината. (Крај)

извор: ОхридПрес фото: архива