Охрид, 28. април 2018 (ОХРИДПРЕС) – Првиот Меѓународнен меморијален атлетски митинг „Влатко Димитров“ заврши повеќе ос успешно, учениците на Димитров го продолжуваат неговото дело, а од следната година овој настан финансиски ќе биде помогнат од локалната самоуправа.
Околу 140 натпреварувачи од Македонија, Србија, Косово, Албанија, Црна Гора и Бугарија се натпреваруваа во девет дисциплини.
Организатор на настанот беше АК „Охрид“, помогнат од Атлетската федерација на Македонија. За отворен го прогласи градоначалникот Јован Стојаноски, кој потсети на значењето на професорот Димитров како педагог,професор, тренер и потенцира дека општината во договор со АФМ ќе постапи како што постапуваше професорот, упорно и безрезервно.
– Ние како општина, по потпишувањето на меморандумот со АФМ, очекуваме овој митинг да биде традиционален. Ние како општина ќе го ставиме во буџетската програма, потенцира Стојаноски.
Професорот Влатко Димитров остави длабоки траги во охридската и македонската атлетика и на овој начин сакаме ние како клуб да му се заблагодариме за неговата посветеност,ентузијазам и љубов спрема кралицата на спортовите, рече претседателот на АК „Охрид“, Пецо Неданов.
– Атлетиката секогаш за него беше на прво место.Со неговата посветеност АК „Охрид“ доби голем број на екипни први места во натпреварите во РМ,се постигнаа многу државни рекорди, а голем дел од нив и ден денес важат. Витрините на АК „Охрид“ се преполни со пехари и медали освоени на домашната и меѓународната сцена, како и многу други признанија, потенцира Неданов.
Она што особено радува се резултатите кои ги постигнаа неговите ученици и членови на АК „Охрид“. Јулијана Вељаноска освои прво место во дисциплината фрлање ѓуле, а второ во фрлање диск. Мартина Мироска освои злато во женска конкуренција во скок во далечина.
Блаже Љушев беше трет во машка конкуренција во скок во далечина, Марија Јованоска освои бронза на 400 метри, Елена Лазороска беше трета на 1.500 метри, а Емилија Лазороска освои сребрен медал во 3.000 метри стиплчејз за жени.
Стефан Стефаноски беше прв во фрлање диск, со што го сруши личниот рекоред, а трет беше во дисциплината фрлање копје. (Крај)
извор: ОхридПрес фото: ОхридПрес/Бојан Симјаноски
