Избор Охрид ТОП ВЕСТИ Туризам

Европскиот џин „Алди“ нуди патувања во Охрид и Македонија

Берлин, 5. јули 2019 (ОХРИДПРЕС) – Македонските туристички потенцијали се најдоа и во понудата на најголемиот синџир во трговијата на мало во Европа, германскиот концерн „Алди“.

Уникатни крајолици, фасцинантни градови и импознантни културни богатства – вака најголемиот трговски џин во Европа, германскиот синџир „Алди“, ги продава своите патувања во Македонија и на Балканот.

Во најновата понуда на „Алди-патувања“ се застапени пакет-аранжмани за десетдневни патувања во Северна Македонија и Бугарија во 2020 година, по цена од 949 до 1.099 евра, со можност за попуст, доколку заинтересираните резервираат порано, во висина од 100 до 150 евра. Притоа, се нуди посета на Скопје, на манастирот Свети Јоаким Осоговски, посета на Берово и запознавање со производството на сирење, како и посета на дел од црквите и манастирите во регионот на Струмица. Сѐ се заокружува со посетата на Стоби, каде е предвидена и проба на македонски вина, јави DW.

Македонските убавини се застапени и во понудата за патување низ осум балкански земји, кое чини помеѓу 999 и 1.119 евра. Дел од тоа патување е и посетата на Охрид. Притоа во описот стои: „Со прошетка го откривате градот кој важи за религиозен центар на православната црква. Знаете ли дека Охрид има 365 цркви? Дел од нив ќе запознаете денеска (на деветтиот ден од патувањето кое трае 12 дена, н.з.)!“

Во оваа понуда е предвидена посета на Охрид и езерото, за кое се нагласува дека е „најдлабоко во Европа и второ по длабочина во светот“. „Градот се нарекува и Ерусалим на Балканот, затоа што во него има околу 365 цркви и манастири“, стои во понудата, која предвидува и посета на Струга и Битола, вклучително и Хераклеја.

Image may contain: sky, cloud, ocean, tree, outdoor, nature and water

„Алди-патувања“ е дел од ланецот дисконти „Алди“ и постои од 2007 година. Се нудат одмори, патувања со прекуокеански бродови и тури во градови, но има и специјални понуди како велнес-патувања, детски туристички тури, или патувања на одредени настани. „Алди“ е најстариот германски ланец дисконти и најголемиот трговец на мало во Европа. Браќата основачи на концернот, Карл и Тео Албрехт долго важеа за најбогатите луѓе во Германија. „Алди Север“ и „Алди Југ“ заедно имаат над четири илјади филијали во Германија, а ширум светот – над 10.000 филијали. (Крај)

извор: DW фото: ОхридПрес/DW

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука

Слични објави