Дебрца, 20. август 2019 (ОХРИДПРЕС) – Доделени првите картички за зелена нафта за земјоделците од подрачјето на општините Охрид и Дебрца.

Првите картички ги подели градоначалникот на Дебрца, Зоран Ногачески и раководителот на министерството за земјоделство шумарство и водостопанство – подрачна единица Охрид, Сашо Суклоски.

Со оваа мерка се врши субвенционирање на 30% од трошоците за набавка на гориво. Со тоа се врши значително намалување на производствените трошоци, земјоделците имаат поекономично производство и остваруваат поголеми приходи. Оваа мерка е одговор на децениските проблеми на земјоделците со која се покажува вистинска грижа за земјоделството.

Висината на поддршката за оваа мерка е различна во зависност од површината и видот на културата кои се одгледуваат. Најнискиот износ е 500 денари со кој се опфатени мали производители додека највисокиот износ е лимитиран на 100 илјади денари.

Картички за „зелена нафта“ ќе добијат сите земјоделци кои што имаат поднесено барање за субвенции во текот на 2018 година за мерките од растителното производство односно се производители на полјоделски и градинарски култури како и постоечки овошни и лозови насади. Крајниот рок за искористување на средствата од картичките е април 2020 година

На територијата на општините Охрид и Дебрца картички ќе добијат 1.024 земјоделци со вкупна вредност од 2.090.000 денари.

Картичките земјоделците ќе можат да ги подигнат со лична карта во просториите на Министерството за земјоделство шумарство и водостопанство – подрачна единица Охрид секој работен ден во периодот од 07:30 до 15:30 часот. (Крај)

извор: Општина Дебрца фото: Општина Дебрца