Скопје, 14. јуни 2020 (ОХРИДПЕРС) – ОБСЕ/ОДИХР распиша конкурс за експерти кои треба да ги следат предвремените парламентарни избори во Република Македонија на 5 јули годинава.
Во соопштение објавено денеска на интернет-страницата на институцијата, се наведува дека е прифатена поканата на македонската влада за следење на изборите, јави DW.
– По официјалната покана да се набљудуваат предвремените парламентарни избори во Македонија на 5 јули, и во согласност со својот мандат, ОДИХР се подготвува да испрати Специјална мисија за проценка на изборите, се наведува во соопштението.
Во отворениот конкурс кој завршува на 16 јули, ОДИХР бара шеф и заменик на шефот на мисијата во Македонија, политички аналитичар, изборен аналитичар, аналитичар за регистрација на гласачи, правен и медиумски советник.
Мисијата ќе биде во траење од три недели, а сите кандидати треба да бидат на располагање за извршување на задачите уште од 19 јуни.
Од опозициската ВМРО-ДПМНЕ деновиве реагираа дека не прифаќаат избори без набљудувачка мисија на меѓународните претставници. Прашањето се отвори откако шефот на државата Стево Пендаровски во петокот во обраќањето по повод вонредната состојба рече дека не знае дали е испратена покана до ОБСЕ/ОДИХР за следење на изборите. Меѓународниот секретар на ВМРО-ДПМНЕ, Тимчо Муцунски во петокот изјави дека избори без воспоставена набљудувачка мисија на ОДИХР не може да се сметаат за слободни и кредибилни.
Лидерите на двете најголеми политички партии во земјата СДСМ и ВМРО-ДПМНЕ, Зоран Заев и Христијан Мицкоски досега не успеаја да договорат изборен датум. Од денеска повеќе не е во сила вонредната состојба во земјата, со што продолжија да течат изборните активности. (Крај)
извор: DW фото: архива
