Скопје, 28. септември 2023 (ОХРИДПРЕС) – На Меѓународниот Аеродром Скопје синоќа беше означен означи стартот на сообраќање на новата редовна линија Скопје-Љубљана, на Wizz Air.
– ТАВ ја прославува оваа одлична пригода – воведувањето на новиот лет на Wizz Air на релација Скопје-Љубљана-Скопје. За оваа авиолинија имаше голема побарувачка, со оглед на тоа што има многу деловни патници, студенти и македонски иселеници кои често патуваат меѓу двата града, а речиси 4 години, од 2019 година досега, немаше директна авиоврска меѓу Скопје и Љубљана. Среќни сме што Wizz Air го препозна ова барање и веруваме дека нивните услуги ќе ги задоволат потребите на нашите патници. Воведувањето на оваа нова рута, исто така, ќе им служи и на рекреативните патници и ќе ги зајакне нашите врски со Словенија. Љубљана, со своето богато културно наследство и енергична атмосфера, беше мошне очекувана дестинација за патниците од Скопје. Би сакал да изразам искрена благодарност до WIZZ за нивната одлука да ја додадат оваа рута од нивната база во Скопје, со што ќе се зајакне регионалната поврзаност. Со нетрпение очекуваме да им посакаме добредојде на патниците на скопскиот аеродром, да обезбедиме беспрекорни аеродромски услуги и да создадеме трајни спомени при нивните патувања, изјави Неџат Курт, генерален директор на ТАВ Македонија.
Со оваа нова рута, патниците од Скопје сега имаат пристап до шармантниот главен град на Словенија, Љубљана. Позната по својот живописен стар град, богатата историја и енергичната културна сцена, Љубљана брзо стана дестинација која мора да се посети во Европа.
– Воодушевени сме што дополнително ја прошируваме мрежата од Скопје со нова конекција до Љубљана. Горди сме што сме лидер на нашиот пазар со огромна мрежа од 34 линии до 15 земји, нудејќи над 1.1 милион седишта на продажба за зимската сезона 2023 година, двојно повеќе од минатата година. Фокусирани на континуиран раст, остануваме посветени да им обезбедиме неспоредливо поврзување и искуства од патувањето на нашите патници. Би сакала да им се заблагодарам на нашите колеги од Меѓународниот Аеродром Скопје за нивното одлично партнерство во градењето на подобра поврзаност за Република Македонија и многу сум среќна што ги пречекувам првите патници од Скопје до Љубљана на летовите на Wizz Air, изјави Тамара Никифорова, Менаџер за корпоративни комуникации во групацијата Wizz Air.
Првиот лет од скопскиот аеродром до Љубљана полета вчера, среда, 27-ми септември.
WIZZ ќе лета на оваа релација Скопје-Љубљана-Скопје два пати неделно, секоја среда и недела, нудејќи им на патниците удобен распоред што одговара и на деловните и на рекреативните патници. Времето на заминување во среда од Меѓународниот Аеродром Скопје е 18:40 часот, со време на пристигнување во Љубљана во 20:20 часот, додека полетувањето од Љубљана е во 20:55 часот со слетување на скопскиот аеродром во 22:30 часот. Времето на заминување во недела од Меѓународниот аеродром Скопје е 19:00 часот, со време на пристигнување во Љубљана во 20:40 часот, додека полетувањето од Љубљана е во 21:15 часот со слетување на скопскиот аеродром во 22:50 часот.
Авиобилетите се во продажба по цена почнувајќи од само 1.539 денари. За информации за резервации на авиобилети и за да дознаете повеќе за летовите на Wizz Air, посетете ја официјалната веб-страница на Wizz Air.
ТАВ Македонија, подружница на ТАВ Аеродроми, членка на Групацијата АДП, го заокружи периодот од јануари до август 2023 година со вкупно 2.049.157 патници кои патувале преку двата македонски аеродрома – Меѓународниот Аеродром Скопје и Аеродромот „Св. Апостол Павле“ во Охрид. Ова претставува пораст од 32% споредено со истиот период во 2022 година, додека споредено со 2019, референтната година во авијацијата, статистиките во авиосообраќајот бележат 15% зголемување на бројот на патници. Во однос на бројот на летови, во 8-те месеци од 2023 година реализирани се 15.344 летови, или 20% повеќе летови од 2022, односно 4% повеќе споредено со 2019 година. (Крај)
извор: ОхридПрес фото: архива
