Охрид, 4. август 2024 (ОХРИДПРЕС) – Во музејскиот културен центар „Лапидариум“ во Охрид, во среда, на 7-ми август 2024 година, со почеток во 20:00 часот ќе биде отворена изложбата „Ех, моја Македонија”.
На изложбата која е во сеќавање на познатиот доктор и уметник Драган Спасески Охридски со свои дела ќе се претстават Мајкл Клос од Канада, Демир Демироски Мак од Канада и Наташа Попоска Карче и Ѓоко Симјаноски од Република Макеоднија.
Охриѓани и гостите изложбата ќе можат да ја погледнат со музичка придружба од Маестро Џевад Рамаданоски.
Спасески Охридски почина по кратко боледување, во 60-тата година од животот, во ноември 2020 година. Беше доктор и уметник чии дела повеќе од 30 години ги воодушевуваа љубителите на уметноста во земјава и странство, поет, кој истовремено се занимаваше со дизајн, компјутерска уметничка графика, уредување на ентериери, почитуван од охриѓани, ценет во секоја област.
Роден е во 1960 година и по професија беше доктор-специјалист, хирург ортопед.
Како уметник реализираше повеќе мултимедијални проекти: „Апокалиптичен нарцис“ (1989 година), „Сѐ трепери“ (1996 година), „Блиску до сонцето и љубовта мракот помалку боли“ (1999 година), „Вибрација, креација, совршена релација“ (2001 година), „Охридски ангели“ (2003 година), „Погледни во себе“ (2004 година), „Трите точки“ (2008 година), „Охридски бисери на мудроста“ (2010 година), „Битолска трилогија“ (2011 година), „Човек е трепет … и ангелот трепет е… а ти Боже мој…“ (2017 година). Скоро сите мултимедијални проекти се составени од изложби на ликовни дела и промоција на книги – поезија со истоимениот наслов како мултимедијалниот проект, а некои се проследени и со архитектонски ентериерни креации.
Спасески Охридски важеше за голем презентер на македонската уметност надвор од границите на земјава. (Крај)
извор: ОхридПрес фото: архива
