Охрид, 7. ноември 2024 (ОХРИДПРЕС) – Пред точно 32 години, започна една медиумска приказна која трае повеќе од три децении. Супер радио денеска прославува со покана до сите да го одбележиме денот заедно.

– За нас ова е голем чекор, а каде би биле ние да не бевте токму Вие – нашите најдобри слушатели на целиот свет кои знаат да го ценат она што го работиме и испорачуваме како содржина до сите нив. Од оние кои знаат што е добра музика, за оние кои знаат што е добра музика, порачуваме со силна желба заедно да продолжиме понатаму. Музика, но и многу повеќе – ве информираме, посочуваме на проблемите и слабостите, ве забавуваме и сме постојано заедно во убавите, но и сите останати моменти со својот град. Силно и заедно, продолжуваме понатаму, потенцираат од Супер радио.

Тие се заблагодаруваат до сите кои деновиве испратија честитки и убави зборови до редакцијата. Годинава јубилејот го одбележаа со кампањата „Го чуваме детето во нас“ и посебни аудио и видео материјали кои ги снимија „внуците на Супер радио“, односно децата на сегашни и поранешни вработени во радиото, чиј е светот кој доаѓа и кои се нашата, но и иднината на овој град, државата и целиот свет.

– Повеќе од три децении го чуваме детето во нас. Денеска се искачивме на 32-риот степеник од нашето постоење и отвораме нова врата, 33-та од медиумската приказна наречена Супер радио. Годиниве наназад, во медиумот продефилираа многу талетирани луѓе, кои вградија дел од себе во оваа приказна. Во нивна чест, но и во чест на сите кои се со нас и не слушаат повеќе од три децении, во чест на Баба Маре од Вевчани која ни го даде името и со благодарност до сите наши деловни партнери кои веруваат во нас, продолжуваме понатаму силно и без компромиси. Работиме во преубавиот Охрид, каде секогаш се пуштала и слушала најубавата музика. Нашата мисија е оваа преубава традиција да ја продолжиме понатаму, стои во роденденската порака.

Според сите анкети на АВМУ, Супер радио е убедливо најдобрата, најслушана и највлијателната локална радио станица во овој регион на Република Македонија. Потврда за успешната работа на радио станицата дојде и од локалната заедница, со доделувањето на Св. Климентовата повелба во 2017 година за досегашната успешна работа и придонес за градот. (Крај)

извор: ОхридПрес фото: ОхридПрес