Промовиран видео записот за „A New Day“, новиот сингл на Владимир Василески- Четкар

Охрид, 13. септември 2023 (ОХРИДПРЕС) – „A New Day“ е новиот сингл на познатиот охридски гитарист Владимир Василески- Четкар, за кој денеска беше промовиран и видео записот, снимен во нашиот прекрасен Охрид.

– Прекрасни пријателки и пријатели. Ви го претставувам моето ново музичко видео и нов сингл „A New Day“. Им благодарам на сите сакани луѓе кои беа дел од ова искуство и на Симјаноски Бојан за мајсторски завршената работа со видео записот. Се надевам дека ќе уживате и дека ќе ја почувствувате позитивната енергија која преовладуваше за време на целото снимање како на музиката така и на видеото, порача Четкар.

Станува збор за песна која е комплетно авторско дело на Четкар и е снимена со инструменти во живо во Чикаго во студиото „Electrical Audio“ на познатиот американски продуцент Стив Албини, кој е познат и по соработките со Нирвана, Лед Зепелин и други.

Најново од Четкар е што на почетокот на октомври заминува на турнеја во Јужна Кореја. На неговиот официјален профил на Facebook тој објави дека е предвиден и концерт на 20 годишниот јубилеј на еден од најголемите џез спектакли во светот, Jarasum Jazz Festival.

– На 6-ти октомври 2023 година ќе се одржи концерт во Jazz Venue во Seoul, веќе следниот ден е концертот на Jarasum Jazz Festival, а на 8-ми октомври е предвиден настап во Gangneung на Gangneung Arts Center, информира Четкар.

Додава дека со него на турнејата доаѓа и проверена македонска музичка екипа составена од Филип Стефановски, Филип Димишковски, Џоле Максимовски, Дино Милосављевиќ, како и Bobby Walker.

Песната неодамна имаше и радиска промоција во Охрид, како SuperPLAY на програмата на Супер радио. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука