Китески: Кривична пријава за Гордана Јованоска, поранешен директор на ЈП „Билјанини Извори“ за сериозни злоупотреби

Охрид, 22. март 2024 (ОХРИДПРЕС) – ЈП „Билјанини Извори“, врз основа на ЗКП на РМ поднесе кривична пријава до ОЈО Охрид и СВР Охрид, поради основано сомнение дека пријавената Гордана Јованоска, како поранешен директор на претпријатието извршила продолжено кривично дело „Злоупотреба на службената положба и овластување“ по чл. 353 ст. 4 в.в. ст. 1 а в.в. со чл. 45 од Кривичниот законик на РМ, информира на денешната прес конференција потпретседателот на ОК на ВМРО-ДПМНЕ од Охрид, Александар Китески.

– Пријавената Гордана Јованоска злоупотребувајќи ја својата службена положба и овластување на директор на ЈП „Билјанини Извори“, спротивно на законските приписи и тендерската документација, во име и за сметка на претпријатието, во 2018 година по спроведена постапка за јавна набавка, со правното лице „Електро Софт Инженеринг“ ДОО Скопје, во својство на носител на набавката, склучила Договор за јавна набавка на услуги за имплементација и експлоатација на систем на зонско паркирање на паркинг простор со цена на извршување на услугите од 1.016.900 денари, односно износ од 1.200.000 денари со ДДВ, која цена на извршување на услугите ќе се надоместува во вид на надомест од 15% од вкупниот нето приход, па не назначувајќи дека максималниот износ т.е. не назначувајќи дека цена на услугите која може да ја исплати јавното претпријате и кој износ не смее да се надмине е износот од 1.200.000 денари со ДДВ, овозможила по исплата на овој износ, носителот на набавката да фактурира и наплаќа дополнителен износ, во случај кога за истото немал законски и правен основ, а со кои дејствија на јавното претпријатие му причинила значителна материјална штета над 3.000.000 денари, истакна Китески.

Тој додаде дека пријавената Гордана Јованоска од Охрид во својство на директор на ЈП „Билјанини Извори“ Охрид, злоупотребувајќи ја службената положба и овластување на директор на јавното претпријатие, без да спроведе постапка за јавна набавка и без да склучи договор за јавна набавка, во период од мај до октомври 2020 година продолжила да ги користи услугите на правното лице „Електро Софт Инженеринг“ ДОО Скопје за имплементација и експлоатација на систем на зонско паркирање на паркинг простор со кој располага ЈП „Билјанини Извори“ Охрид и вршела плаќање на паричен надомест на ова правно лице, со што на ЈП „Билјанини Извори“ Охрид му причинила значителна материјална штета од над 1.000.000 денари.

– Пријавената, по спроведена постака за јавна набавка во октомври 2020 година, во својство на директор склучила договор заведен кај ЈП „Билјанини Извори“ Охрид на 20-ти октомври 2020 година за јавна набавка на услуги за тековно одржување на паркинг системот плементација и експлоатација на систем на зонско паркирање. Овој Договор е со важност од 24 месеци. За време на важење на овој Договор цената за извршување на услуги изнесува 1.000.000 денари со вклучен ДДВ, а кој надоместок требало да биде исплатен во вид на надомест од 15% од остварениот приход на претпријатието месечно, исклучиво по основ на наплата на паркирање преку SMS пораки. За реализација на овој договор, пријавената како директор на ЈП „Билјанини Извори“ од Охрид исплатила надомест поголем од договорениот во јавната набавка, односно предизвикала штета во значителен износ кој е поголем за 1.000.000 денари. Повикуваме ОЈО Охрид веднаш да постапи за ваквите незаконски дејствија и да даде налог на незаконски поставениот началник на Економски криминал во СВР Охрид, Сашо Јанкоски да спроведе истрага по основа на оваа кривична пријава. Само со одговорност за сите сторени кривични дела ќе завладее правдата и правото. Доста е од наградувања со две директорски места во исто време како заслуги за партиски услуги и непотизам, доста е од криминално владеење, доста го уназадуваа Охрид и ја распродаваа Македонија. Доста ги уништуваа јавните претпријатија, порача Китески.

Од страна на ЈП „Градски гробишта“ од Охрид до ОЈО и СВР Охрид, неодамна беше поднесена кривична пријава и против поранешниот директор на ова претпријатие, Ванчо Костоски, поради основано сомнение дека сторил злоупотреба на службената положба и овластување. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука