Охрид, 15. март 2017 (ОХРИДПРЕС) – OhridPress го започна проектот „Охрид во 10“, во рамките на кој Ви нуди дневна фотографија од Охрид снимена од една точка, која го прикажува во неговата комплетна раскош и убавина.
– Идејата е да го видиме Охрид од една точка на сонце, снег, дожд, по убаво и по лошо време, како потврда за неговата безвременска убавина. Одбравме една точка која е исклучително препознатлива и го прикажува токму онаков каков што е – древен и прекрасен, но во исто време град во кој живеат луѓе кои се нераскинлив дел од светот и модерниот начин на живот. Исто така ќе се регистрираат и најважните настани кои го одбележале секој ден и ќе биде како еден календар на живеењето на градот во 2017-та година. Сакаме на крајот сетоа тоа да го издадеме и во групна – принтана форма, но за тоа на крајот на следната година, велат од Супер радио, кои се носители на проектот.
Охрид во 10 на 15.03.2017 година
Проектот „Охрид во 10“, покрај на Facebook, веќе доби и сопствена веб страна, а фотографиите секој ден ќе бидат објавувани и на информативниот портал OhridPress.
инфо: 15.03.2017 година
– Охрид SOS повторно побара Општина Охрид да го поништи незаконски издаденото одобрение за градба во Лагадин
– Она што му се случи на мојот син, никогаш да не се повтори во Охрид, порача Драгица Матилоска, мајката на убиениот Димитар Матилоски, за време на промоцијата на нејзиниот дневник, посветен на изгубеното чедо
– Кај селото Подмолје настана пожар, изгоре широк појас на трска
– „Потребно е градење на дигитален свет, што всушност промовира подобар пристап и партиципација за потрошувачите во општеството“, вели Вангел Спироски, претседател на Организацијата на потрошувачи на Охрид, по повод денешниот ден, 15-ти март – Светскиот ден на Правата на Потрошувачите
– Центарот за комуникации на ОО на СДСМ Охрид, во врска со случајот Лагадин, бара локалната власт во Охрид да престане да го уништува природното наследство и додаваат дека ќе поднесат одговорност сите што работеле противзаконски
– Даночното одделение на УЈП во Охрид денес со продолжено работно време до 20 часот поради поднесување Годишни даночни пријави
– Заврши обврската на задолжително носење зимска опрема за возилата, од СВР Охрид информираат дека учесниците во сообраќајот од Охрид се придржувале на прописите
– Имаше повеќечасовен прекин во водоснабдувањето во Пештани
– Покрај настапите Четкар во Тајланд снимаше и емисија за националната телевизија Брајт ТВ
– Таеквондо клубот ХВА РАНГ ИТФ Лескоец го најави своето учество на турнирот „Чешка Опен 2017“
