Денеска ќе се одржи 50. Општински натпревар по прва помош

Охрид, 13. април 2024 (ОХРИДПРЕС) – Под мотото „Првата помош спасува животи“, Црвен крст Охрид, денеска ќе го организира традиционалниот, 50-ти по ред Општински натпревар по прва помош.

На натпреварот, стекнатите знаења и техники за укажување на прва помош ќе ги покажат повеќе од 150 ученици-натпреварувачи од основните и средни училишта од Охрид и Дебрца, организирани во екипи во категорија подмладок и категорија младина.

– И оваа година на општинскиот натпревар по прва помош ќе се применуваат критериуми и стандарди кои се спроведуваат при одржување на европските натпревари по прва помош. Во таа насока, натпреварувачите, но и посетителите на овој настан, на повеќе пунктови низ градот Охрид, почнувајќи од плоштадот „Св. Климент Охридски“, на платото пред Градската библиотека, по градскиот кеј, ќе бидат сведоци на симулирани случки на несреќи, изведени од членовите на актерските групи на Црвен крст Охрид, како и реалистички приказ на повреди, подготвени од посебно обучени шминкери за повреди на Црвен крст Охрид. За регуларноста и оценувањето на натпреварувачите ќе се грижат 15 судии за прва помош на Црвен крст Охрид, информираат од охридскиот Црвен крст.

Несреќите се случуваат секојдневно и насекаде, во домот, на улица, на училиште, на работно место, на игралиште, во природа и каде ли уште не. Во такви ситуации правилното укажување прва помош значи спасување човечки живот. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука