Прва пресуда за „Рекет“ денеска за третообвинетиот Зоран Милевски Кичеец

Скопје, 4. декември 2019 (ОХРИДПРЕС) – Во Основниот кривичен суд во Скопје денеска напладне ќе биде изречена првата пресуда за случајот „Рекет“, откако вчера на првото рочиште третообвинетиот Зоран Милевски – Кичеец призна вина за делото.

Милевски се товари за „примање награда за противзаконито влијание“.

Бранителот на Зоран Милевски Кичеец, адвокат Александар Новаковски, во завршен збор рече рече дека обвинетиот од самиот почеток на процесот, имал шанса како сведок да го избегне обвинението, но тој од незнаење се довел во ситуација да биде обвинет.

– Судот да има предвид дека е татко на пет малолетни деца и досега е неосудуван. Тој од самиот почеток, иако не призна вина, ја зборуваше вистината пред Јавното обвинителство. Верувам дека Судот ќе го цени и признанието на вина – изјави адвокатот Александар Новаковски.

Обвинителката Вилма Рускоска, во воведен збор наведе дека ќе изнесат докази дека Боки 13 преку Кичеец први стапиле во контакт со Ана Камчева и дека не заборавил да ја земе торбата полна пари.

– Со оглед дека обвинетиот ја призна вината, предлагам Судот да му изрече казна според олеснителни и отежителни околности – рече Рускоска.

Судскиот преоцес „Рекет“ продолжува во петок против Бојан Јовановски – Боки 13 и поранешната специјална јавна обвинителка Катица Јанева.

Првообвинетиот Јовановски се сомничи дека сторил кривично дело „перење пари и други приноси од казниво дело“, а Јанева за „примање награда за противзаконито влијание“ и за „злоупотреба на службена положба и овластување“.

Јанева се наоѓа во домашен притвор додека Бојан Јовановски е во КПУ Затвор-Скопје каде што издржува мерка притвор. (Крај)

извор: Плус инфо фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука