50 Cent и Busta Rhymes во октомври доаѓаат во Загреб со единствен концерт во регионот

Загреб, 2. јуни 2023 (ОХРИДПРЕС) – Curtis James Jackson III, попознат како 50 Cent, ќе одржи концерт на 17-ти октомври 2023 година во Загреб, како дел од големата светска турнеја „The Final Lap Tour“, со која наградуваниот рапер, телевизиски продуцент и актер ќе прослави 20 години од објавувањето на неговиот деби албум „Get Rich or Die Tryin“, еден од најважните и најпродаваните hip hop албуми во историјата.

Турнејата започнува во јули во Salt Lake City, а 50 Cent ќе ги посети САД, Велика Британија, Европа и Австралија и ќе одржи над 80 концерти до почетокот на следната година. Концертот во Загреб е негова единствена посета на регионот како дел од оваа турнеја. На целата турнеја, тој е придружуван од неговиот голем пријател и уште еден hip hop великан – Busta Rhymes.

Поради големиот интерес на публиката и распродадените концерти за само неколку недели, додадени се нови датуми во Велика Британија и Европа, а неодамнешната изјава на 50 Cent дека ова може да биде неговата последна турнеја, предизвика уште поголема побарувачка за билети.

– Морам да се фокусирам на моите филмски и телевизиски проекти и имам многу други работи кои се случуваат зад сцената на кои треба да работам. Нема да одам на турнеи како порано. Но, овој пат навистина се забавувам и не чувствувам притисок, им порача тој на фановите. Дополнително, пред почетокот на турнејата „The Final Lap Tour“, 50 Cent вети сет листа составена од дури 50 песни, неговите најголеми хитови и песните кои им се омилени на сите оние кои ја почитуваат неговата работа и кои со децении не ги изведувал во живо.

Признат како еден од најталентираните и најплодните hip hop изведувачи на своето време, добитник на Grammy, Emmy, Billboard Music и MTV Music награди, тој се прослави со својот рекорден деби албум „Get Rich or Die Tryin“ кој се продаде во повеќе од 30 милиони копии ширум светот. Сингловите како „In da Club“, „P.I.M.P“ и „21 Questions“ доживеаја глобален успех, а на албумот гостувааа имиња како Young Buck, Nate Dogg, Tony Yayo, Lloyd Banks и Eminem, кој беше откриен токму од 50 Cent и веднаш беше „регрутиран“ за неговата издавачка куќа Shady Records. Албумот веднаш се искачи на врвот на Billboard 200 листата и беше најпродаваниот албум во 2003 година во САД.

50 Cent ќе ја „одработи“ целата турнеја во друштво на неговиот голем пријател Busta Rhymes, уште едно неизбежно и големо име во hip hop музиката. Еден од најдобрите hip hop текстописци, познат по својот уникатен визуелен стил, Busta Rhymes е номиниран за наградата Grammy дури 12 пати. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука