Со одличен концерт во МКЦ, охриѓаните Hardfaced одбележаа 20 години постоење (Фото)

Скопје/Охрид, 24. март 2024 (ОХРИДПРЕС) – Со одличен концерт кој се одржа во Младинскиот културен центар во Скопје, охриѓаните Hardfaced, едни од предводниците на македонската хард кор/метал сцена, синоќа одбележаа 20 години постоење.

– Каква вечер. Огромна благодарност за целата поддршка изминативе две декади, порачаа од групата од каде испратија благодарност и до специјалните гости на вечерта, легендарниот бугарски хард кор бенд „Лест хоуп“ и скопската група „Ју“, како и до комплетната екипа позади сцената.

Hardfaced се основани во почетокот на 2004 година во Охрид. Во 2007 излегува нивниот деби албум „More than hate” кој добива одлични критики во Македонија и низ Балканот. Во 2011 излегува вториот албум „Show them what they fear”, по кој следуваше и третиот „Dying Lake”. Последното, четврто студиско издание „Бессона дремка на брегот на младоста“ излезе пред пет години. Зад себе имаат неколку Европски и Балкански турнеи и свиреле со бендови како Biohazard, Unearth, Stampin’ Ground, 7 Seconds, Parkway Drive, Born From Pain, No Turning Back, Romeo Must Die, Devil In Me, Last Hope и многу други. (Крај)

извор: ОхридПрес фото: FB/Hardfaced/stefan.rajhl

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука