Здравје: На Сардинија луѓето често живеат до 100 години, ова се нивните навики

Охрид, 26. септември 2024 (ОХРИДПРЕС) – Raeleen D’Agostino Mautner, која помина долги години проучувајќи го италијанскиот начин на живот, особено им се восхитува на луѓето од Сардинија – едно од ретките места во светот познати како Сини зони, каде луѓето живеат исклучително долг живот.

Иако генетиката игра улога во долговечноста, таа е само околу 20 до 25% од разликата во животниот век. Останатиот дел зависи од животниот стил – навики кои можеме и треба да ги контролираме. Еве неколку клучни навики на жителите на Сардинија кои би можеле да ни помогнат да живееме подолго и поздраво.

Денови исполнети со физичка активност

Жителите на овој прекрасен остров не се занимаваат со формален тренинг и не размислуваат за вежбање на начинот на кој го правиме тоа ние. Наместо тоа, тие се постојано активни во текот на денот – сточарство, градинарство, потрага по печурки… Нивниот ридски пејзаж обезбедува природни услови за движење, а активностите како што се пешачење на свеж воздух и извршување на секојдневните задачи им помагаат да останат фит, без потреба од дополнителен тренинг. Истражувањата потврдуваат дека редовната физичка активност може значително да влијае на нашето здравје и долговечност. Иако можеби не живееме во средина како жителите на Сардинија, можеме да направиме мали промени – да пешачиме секој ден или да се качуваме по скалите наместо постојано да користиме лифт.

Свежа, домашна храна, но без претерување

На Сардинија ретко се јаде брза храна. Наместо тоа, тие се држат до свежата, локално одгледувана храна што ја подготвуваат во нивните кујни. Нивната исхрана се базира на едноставни, сезонски јадења, без конзерванси и адитиви. Тие ретко јадат месо, најмногу четири до пет пати месечно, а нивниот главен извор на протеини доаѓа од гравот и други растителни извори богати со влакна и хранливи материи. Оваа едноставна и здрава исхрана, не само што го одржува телото витално, туку придонесува и за нивното ментално здравје. Жителите веруваат во важноста на традиционалната храна која е полна со вкус, но и се подготвува со љубов.

Социјална активност – клуч за среќа и здравје

Една од тајните на жителите на Сардинија е нивната силна поврзаност со семејството и заедницата. Најстарите членови на општеството играат важна улога во нивните семејства и заедници – тие се почитувани, нивната мудрост се цени и честопати се централни фигури на семејните собири. Дружењето, споделувањето оброци, одењето во црква, играњето заеднички игри и разговорот со пријателите се дел од секојдневниот живот што им дава чувство на заедница. Овие активности им помагаат да се справат со стресот и да одржат високо ниво на ментално здравје. (Крај)

извор: index.hr фото: index.hr

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука