Почина Maxi Jazz, пејачот на култните Faithless

Лондон, 24. декември 2022 (ОХРИДПРЕС) – На 65-годишна возраст синоќа почина Maxi Jazz, пејачот на култната dance група Faithless.

На официјалниот профил на групата на Facebook е објавена информација со порака дека „нивните срца се скршени“.

– Беше човек кој ги смени нашите животи на толку многу начини. Тој ја даде вистинската порака преку нашата музика. Беше чест и вистинско задоволство да се работи со него, порачаа од групата.

Rollo и Sister Bliss додаваат дека Maxi Jazz беше брилијантен текстописец, Dj, човек кој уживаше на сцената, прекрасна личност, но и вистински морален компас и гениј.

Роден како Maxwell Fraser на 14-ти јуни 1957 година во Brixton, London, Maxi Jazz важеше за исклучително талентиран Британски музичар, рапер, пејач, текстописец и Dj. Сепак, најпознат е како главен вокал на Британскиот dance бенд Faithless, од 1995 до 2015 година.

Faithless работат заедно од 1995 година, а покрај Maxi Jazz, членови на групата се Rollo и Sister Bliss. Нивниот прв албум „Reverence“, беше издаден во 1996 година и ги донесе dance химните „Insomnia“ и „Salva Mea“, двете продадени во повеќе од милион копии.

Вториот албум на групата „Sunday 8PM“, издаден во 1998 година, го носи глобалниот хит „God Is A Dj“ и го зацврстува нивниот статус на гиганти во dance музичката индистрија. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука