Сузбиена организирана криминална група инволвирана во недозволена трговија со кокаин (Видео)

Скопје, 4. април 2023 (ОХРИДПРЕС) – На 3-ти април 2023 година, Одделот за сузбивање на организиран и сериозен криминал – Сектор за криминалистички истраги – Единица за недозволена трговија со дрога врз основа на спроведена повеќемесечна меѓународна истрага и формирани истражни тимови помеѓу Основното јавно обвинителство за гонење на организиран криминал и корупција (ОЈО за ГОКК), Специјалното јавно обвинителство и Одделот за организиран криминал на Република Албанија спроведе координирана полициска акција, при што изврши претреси на повеќе локации на подрачјето на Скопје и Прилеп и лиши од слобода четири лица, и тоа А.М.(51), Д.З.(37), М.Ј.(35) и Д.Ј.(39), сите од Скопје.

– Денеска, 4-ти април 2023 година, до ОЈО за ГОКК поднесена е кривична пријава против А.М., Д.З., М.Ј., сите од Скопје, како и против Р.Т.(45) од Прилеп, поради постоење на основано сомнение за сторено кривично дело „неовластено производство и пуштање во промет наркотични дроги, психотропни супстанции и прекурсори” по член 215 ст.3 од Кривичниот законик, соопшти Сузана Прањиќ- Талевска од МВР.

Четирите лица се дел од меѓународна организирана криминална група инволвирана во организирање на транспорт на кокаин за земјите од ЕУ, кои во текот на јуни 2021, од непознати лица од Албанија набавиле, а потоа и организирале пренесување на 300 пакувања со маса од 324,4 килограми кокаин за Република Италија со товарно возило „Даф“, со приколка, со скопски регистарски ознаки, управувано од Н.А.

– Имено, на 16.06.2021 година Н.А. на ГП „Ќафасан“ остварил излез од Република Македонија кон Република Албанија, при што на царинските управи на двете држави декларирал извоз на легална стока-железо, со крајна дестинација во Италија. Истиот ден, А.М. и Р.Т., одделно, на ГП „Блаце“ оствариле излез од државата кон Косово, а потоа заедно, со патничко возило, преку ГП Морина/Кукс се упатиле кон Албанија. Следниот ден, на 17-ти јуни 2021 година, Д.З. и М.Ј. на ГП Блаце оствариле излез кон Косово, а потоа со патничко возило преку ГП Морина/Кукс се упатиле кон Албанија. Потоа, по претходен договор, на локација во Албанија приколката била одвоена од влекачот, управуван од Н.А., а во просторот кај резервоарите за нафта во влекачот биле ставени 300 пакувања со бруто маса од 324,4 килограми кокаин, набавен од албански државјани. Потоа приколката повторно била споена со влекачот, кој се упатил кон пристаништето Драч, со цел стоката да се пренесе во Италија, по претходна организација на А.М., Р.Т., Д.З. и М.Ј. На 18.06.2021 година на ГП на пристаништето во Драч, Република Албанија, од страна на службени лица – цариници од Царинската управа на Република Албанија, извршено е скенирање на товарното возило со приколка управувано од Н.А., при што во влекачот биле забележани сокриените пакувања, по што бил извршен претрес и биле пронајдени 300 пакувања кокаин со вкупна тежина од 324,4 килограми. Против Н.А. е поднесена кривична пријава до надлежното Специјално јавно обвинителство во Тирана, Република Албанија за сторено кривично дело поврзано со недозволена трговија со наркотични дроги. Поради ова, на 03.04.2023 спроведена е полициска акција на повеќе локации на подрачјето на Скопје и Прилеп, а врз основа на издадени наредби извршен е претрес кај лицата, при што се пронајдени и одземени повеќе мобилни телефонски апарати, сим картички, патничко возило и документација. При обид да биде лишено од слобода, едно од лицата, Р.Т. не почитувал полициска наредба и со возилото удрил во службено полициско возило, при што се здобил со тешки телесни повреди и е задржан на болничко лекување. Притоа, четирите лица се лишени од слобода, а кривично пријавените се изнесени пред судија на претходна постапка, информираат од МВР. (Крај)

извор: ОхридПрес фото/видео: МВР

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука