Охрид, 23. ноември 2023 (ОХРИДПРЕС) – Од Локалниот огранок на партијата Левица излегоа со нова, „едитирана“ верзија на реакцијата до јавноста, поврзана за истата тема, но без тврдењето за наводно отстранетиот статус на градоначалникот Пецаков, за грозоморните борби со кучиња кои се случуваат во Охрид.

Откако јавноста беше информирана за грозоморните борби со кучиња кои се случуваат во Охрид, на веќе подготвен терен, дел од учесниците во ваквите крвави борби почнаа да се закануваат на здруженијата кои објавија, велат во реакцијата.

– Црните пари од овие борби се заработуваат на рингот зад новата база на контроверзниот бизнисмен во Општина Охрид, Нефи Усеини. Дел од информациите кои пристигнаа до Левица се дека земјиштето каде е подигнат рингот е во сопственост на Нефи Усеини, па алармираме до СВР Охрид да преземе дејствија за откривање на сопственикот. Грозоморната и добро организирана криминална шема им е добро позната на институциите и на Секторот за внатрешни работи – Охрид, но досега ниту еден сторител не е казнет. Со оглед на високата партизираност во правосудството, Министерството за внатрешни работи и Агенцијата за храна и ветеринарство (од страна на ДПМНЕ, СДС и ДУИ), јасно е дека овие лица се заштитени од секоја гарнитура на власт, реагираат од партијата.

Додаваат дека во член 233 од Законот за Убивање и мачење животни, во точка 1 стои: „Тој што ќе усмрти животни без оправдана причина или грубо го злоупотребува или го изложува на непотребни маки или му нанесува непотребни болки или заради изживување го изложува на страдање, ќе се казни со парична казна или со затвор од три години“.

Од Левица ЛО Охрид се со став дека преку ваквото тешко кривично дело уште еднаш испливува на површина хендикепот на институциите конструирани од сите досегашни политички коалиции. (Крај)

извор: ОхридПрес фото: ОхридПрес