Три децении Банда Инструментале: Суперхикс денес слават 30 години постоење

Скопје, 3. март 2024 (ОХРИДПРЕС) – Македонска ска-панк група со реге, латино, џез, свинг и балкански музички влијанија Суперхикс денеска прославува полни 30 години успешна работа.

Групата била формирана пред точно три децении од три средношколски другари: Петар Младеновски, Зоран Жежов – Кечо и Борис Минов.

На нивниот официјален профил на Facebook роденденот го прославија со објава на неколку факти за првите 30 години од постоењето на бендот:

1. Првиот настап на бендот се случи во клубот Доорс, скопско Дебар Маало на 03.03.1994 година (истиот е документиран и запишан на една страница (импресии, листа на изведени нумери, опис на атмосфера) од страна на вокалистот на бендот.
2. Бендот сите овие 30 години АКТИВНО работи, без поголеми паузи и слично (не се случило комплетно да престане да работи или направи пауза со проби и настапи на подолг рок).
3. Бендот зад себе има 6 студиски (последниов излегува за неполн месец), 1 Бест Оф албум, 1 Лајв албум, 1 Демо ЕП („Музика за весели и тажни“ 1999), 1 Демо Касета („Јодл“ 1994) и еден куп демо и неиздадени снимки. Првиот менаџер и извршен продуцент на бендот е Логин Кочишки.
4. Суперхикс во овие први 30 настапија со светски реномирани музички артисти како: Many Chao & Radio Bemba Sound System, House of Pain, Tito & Tarantula, Green Day, Faith No More,Morcheeba, Moloko, Kosheen, The Hives, Rico Rodriguez, Fishbone, 30 Seconds to Mars, Gogoll Bordello, Flogging Molly… A од регионалните и домашните со: Мизар, Ласт Експедишн, Санаториум, Смат, Дени те Чува, Стринг Форсис, Фолтин, Конкеринг Лајон, Атиист Рап, KUD IDIJOTI, Hladno Pivo, Partibrejkers, The Jinx, Rambo Amadeus, Električni Orgazam, TBF, Elvis Jackson, Pridigarji, WICKEDA, Popa Sapca, Dino Merlin (на ова не сме баш горди, ама тоа е Звонко Богдан, Шабан Бајрамовиќ, Кочани Оркестра, Серчук Оркестра, Гоце Арнаудов, Ферус Мустафов, Благица Павловска….
5. Суперхикс зад себе имаат десетици турнеи на кои посетиле и отсвиреле концерти (фестивали у клубови) во над 18 земји (Италија, Швајцарија, Чешка, Словачка, Франција, Унгарија, Романија итн…). На некои од овие концерти имале и вкупна посета од 2ца пијаници и 1 куче а на некои и до 15.000 посетители!
6. Суперхикс беа: Зоран Жежов-Кечо, Боули, Живко Шулинчевски, Лазар Дарковски, Коста Велков, Ивица Ивановски – Папак, Горан Папаз, Симе Златков, Стефан Алексовски – Цефо, Пере Мелов,Славе Спировски, Петар Колевски и се надеваме не забораваме некого. И секако почесниот член – Димитар Тодоровски- Диме Труба!
7. Денеска се: Петар Младеновски, Борис Минов, Дарко Попов, Александар Спасовски – Жути, Бранко Илиевски, Гоце Лалковски, Валентин Видовиќ.
8. И последно за сега..

Додаваат дека минатата година ветија голем концерт со пријателите токму на овој датум, но, за жал тоа не се случи, како што велат, од Х причини.

– Ветуваме дека истиот ќе се реализира некаде кон средината на јуни оваа година во Скопје на open air локација и тоа ќе биде една гоооолема фешта и уживање и за вас драги наши и за нас. Во план е и изработка на документарец за првите 30, изложба на плакати и фотографии од турнеи и настапи низ годините, акустик сесија, промоција на новиот албум на платформи(подоцна и на винил) , спот за најновата соработка со Фолтинци, итн итн… Бидете така…. Одиме понатаму! Нека се множат! Ваша Банда Инструментале! Цели 30!!! – порачаа од бендот. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука