Утре на полноќ истекува рокот за собирање потписи за претседателските кандидати

Скопје, 7. март 2024 (ОХРИДПРЕС) – До утре до 24:00 часот трае собирањето потписи за кандидатите кои претендираат да влезат во изборната трка за претседател на државата

.

Заклучно со синоќа до 20:00 часот, собрани се вкупно 110.298 потписи. Засега седум кандидати имаат собрано над 10.000 потписи.

Потписи се собираат во сите подрачни одделенија и канцеларии на Државната изборна комисија (ДИК) сместени во седиштата на 34 локални самоуправи и пред надлежните нотари. Подрачните одделенија работат две смени и тоа денес до 20:00 часот, а утре од 08:00 до 24:00 часот.

ДИК презема чекори за олеснување на формално-правната процедура за кандидатите кои ќе се натпреваруваат за претседател на државата. Со новиот механизам, ДИК автоматски ќе ги прибавува потребните податоци од соодветните регистри на надлежните институции за да потврди дека кандидатите ги исполнуваат уставните и законските услови за кандидатура.

Ова значи дека кандидатите повеќе не треба самите да обезбедуваат потврди за нивниот државјанство и жителство во Република Македонија.

Исто така, ДИК го усвои Водичот за гласање за лицата со попреченост, што им овозможува на овие лица полесен пристап и учество во гласачкиот процес. Ова е чекор кон подобрување на изборниот процес и овозможување на сите граѓани да ги исполнат своите демократски права без пречки. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука