Календар на МПЦ: Света маченичка Гликерија

Охрид, 26. мај 2024 (ОХРИДПРЕС) – Православните христијани денес го одбележуваат споменот на Света маченичка Гликерија.

Ќерка на еден гувернер на Рим. По смртта на татко ѝ, осиромаши и се насели во Трајанопол во Тракија. Во времето на нечестивиот цар Антонин Гликерија беше изведена да му принесе жртва на идолот на Диј. Таа си нацрта крст на челото, па кога царскиот намесник ја запраша каде е нејзината лампада (зашто сите носеа лампади во рацете), Гликерија го покажа крстот на челото и рече: „Ова е мојата лампада“.

На нејзината молитва гром удри во идолот и го искрши на парчиња. Намесникот се разгневи и нареди да ја бијат и да ја затворат. Ги запечати затворските врати, решен да ја убие со глад. Меѓутоа, на Гликерија ѝ се јавуваше Ангел Божји и ѝ даваше небесна храна. По извесно време, кога намесникот мислеше дека маченичката мора да умрела од глад, го отвори затворот и се зачуди кога ја виде здрава, светла и весела. Кога го виде ова чудо, стражарот Лаодикиј и самиот Го исповеда Господ Христос и веднаш беше заклан.

По ова, Гликерија беше фрлена во огнена печка, но остана неповредена од огнот. Стоејќи насред огнот Го фалеше Бога, споменувајќи го чудото со Тројцата Младенци во Вавилонската печка. Најпосле беше фрлена пред лавови и откако Му се помоли, оваа света девица Му ја предаде својата душа на Господа, за Кого јуначки претрпе многубројни маки. Чесно пострада во 177 година.

Од нејзините мошти потече целебно миро, кое исцелуваше болни од најтешки болести.

Тропар

Со Крст на челото обрезана, света Гликеријо, патот маченички ода на радоста постана, душа-та твоја така Христа Го исповеда, о јагне Христово, о светило на Љубовта, о ти, од која миро миомирисно потече. Моли се света маченичке, моли се достојнославна девственичке, моли се знамение победоносно, кое светло стоиш пред Престолот на Славата, за спасение на нашите души. (Крај)

извор: mpc.org.mk фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука