Здравје: За подобро здравје и слабеење треба да направиме барем десет илјади чекори дневно

Охрид, 4. јуни 2024 (ОХРИДПРЕС) – Пешачењето е практична и ефикасна вежба која може да помогне во согорувањето на калориите, да го подобри нашето кардиоваскуларно здравје и да го подигне расположението.

Веројатно барем еднаш во животот сте слушнале дека за здравје и слабеење треба да правите барем десет илјади чекори дневно, иако многу луѓе не практикуваат ни половина од тоа.

Личниот тренер Kyrie Furr има неколку корисни совети кои ќе ни помогнат да ги исполниме нашите цели.

Поставете си реални цели

Поставувањето реални цели е клучно за одржување на мотивацијата и конзистентноста. Како и со сите други животни цели, вклучително и онаа за десет илјади чекори дневно, важно е да се започне со остварливи цели и постепено да се зголемува бројот на чекори за да се избегне воспаление и повреди на мускулите.

– Важно е постепено да го зголемувате бројот на чекори, наместо веднаш да се стремите кон десет илјади чекори дневно. Ова е тешко да се постигне, ако не сте во форма и ако правите толку многу чекори одеднаш, може да страдате од воспаление на мускулите подоцна, истакнува Furr.

Фокусирајте се на интензитетот

Интензитетот на нашите дневни прошетки е исто толку важен колку и бројот на чекори што ги правиме. За да го подигнеме нашиот интензитет на одење на следното ниво, треба да вклучиме интервали за брзо одење за да го зголемиме пулсот и да го максимизираме согорувањето на калориите.

– Интервалите на брзо одење или зголемувањето на интензитетот на нашите прошетки можат да согорат повеќе калории и да помогнат во подобрувањето на кардиоваскуларното здравје, додава Furr.

Погрижете се прошетката понекогаш да биде предизвик

За да согорите повеќе калории, сменете го темпото на одење и вклучете во прошетката и делови со нагорнини. Ако пешачите надвор, пронајдете некои ридови за искачување, или ако сте на лента за трчање, не бегајте од подигнување на наклонот.

– Со поминати десет илјади чекори дневно, трошите енергија, што може да помогне да се создаде калориски дефицит. Ако согорите повеќе калории отколку што внесувате, поголема е веројатноста да изгубите тежина, истакнува тренерот. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука