Календар на МПЦ-ОА: Свети маченици Прокл и Илариј

Охрид, 25. јули 2024 (ОХРИДПРЕС) – Православните христијани денес го слават денот посветен на Светите маченици Прокл и Илариј.

Овие маченици беа родум од Калипта во Азија и Прокл му беше чичко на Илариј. Пострадаа во времето на Трајан. „Од кој род си?“, го праша судијата Прокл. Прокл одговори: „Христос ми е род и надеж и Бог“.

Кога судијата му се закани со маки, Прокл рече: „Кога вие се плашите да ги престапите царските заповеди за да не паднете во краткотрајни маки, колку ли ние христијаните се плашиме да ја престапиме заповедта Божја за да не паднеме во вечни маки!“ Кога го мачеа Прокл, тогаш Илариј му пристапи на судијата и рече: „И јас сум христијанин“.

После многу мачења обајцата беа осудени на смрт, и тоа Прокл го распнаа на крст, а на Илариј му ја отсекоа главата со меч. И отидоа обајцата во радоста на Господ.

Тропар

Благословен си Ти, Христе Боже наш, Кој Прокло, Твојот слуга, во родот Свој го присоедини, надеж негова стана во маките и исповедта, а тој бестрашниот, во познание и љубов кон Тебе го приведе Илариј. По нивните молитви и нас утврди не’ на каменот на Твоите свети заповеди. (Крај)

извор: Слободен Печат фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука