Докторите Филипче, Милошевски и Миќуновиќ, со новиот хируршки микроскоп извршија сложена операција на тумор на мозок во болницата „Св. Еразмо“ во Охрид (Фото)

Охрид, 14. февруари 2022 (ОХРИДПРЕС) – Со помош на специјалниот неврохируршки микроскоп, стручните екипи на ЈЗУ Специјализирана болница за ортопедија и трауматологија „Св. Еразмо“ во Охрид ќе спроведуваат сложени оперативни зафати од областа на неврохирургијата.

Со новата опрема обезбедена за болницата, пациентите нема да треба да патуваат во Скопје за оперативни зафати.

Како што објави на својот Facebook профил поранешниот министер за здравство д-р Венко Филипче, благодарение на современата апаратура денеска во болницата е извршена операција на тумор на мозок.

– Денеска со моите колеги д-р Милошевски и д-р Миќуновиќ, со хируршкиот микроскоп извршивме операција на тумор на мозок. Овој софистициран микроскоп дава прецизна и детална слика на оперативното поле. На моите колеги им посакувам успех во понатамошната работа, а на пациентот кој денеска го опериравме што побрзо опоравување, објави Филипче.

Неодамна првпат во болницата беше извршена една од најважните и најтешките ортопедски хируршки интервенции, имплантација на протеза на рамо, со што се прошири спектарот на интервенции. (Крај)

извор: ОхридПрес фото: ФБ Венко Филипче

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука