Градоначалникот на Охрид д-р Пецаков со силна поддршка за лицата со ретки болести

Охрид, 21. февруари 2022 (ОХРИДПРЕС) – По повод месецот на ретки болести, градоначалникот на Охрид д-р Кирил Пецаков денеска оствари средба со Гордана Лолеска, претседателка на здружението „Ретко е да си редок“.

– На средбата се разговараше за поддршката која Општина Охрид ја дава за лицата со ретки болести. Годинава за прв пат во општинската програма за социјална и здравствена заштита се воведени стипендии за ученици, студенти, магистранти и докторанти со ретки болести, кои учат и студираат во државни и приватни училишта односно универзитети. Градоначалникот Пецаков потенцираше дека децата и младите од оваа категорија заслужуваат подадена рака и дека ваквите стипендии значително ќе им помогнат во остварување на поголеми образовни успеси. Тој истакна дека потегот на Општина Охрид за воведување на нова категорија стипендии, треба да служи како пример за останатите општини во државата, во насока на помош и поддршка за лицата со ретки болести, информираат од Општина Охрид.

На средбата градоначалникот Пецаков и госпоѓата Лолеска обоија по една дланка како симбол на поддршка за 5% од пациентите со ретки болести кои имаат пристап до лекови, со надеж и порака дека наредната година ќе може да се обезбеди пристап до лекови за 10% од лицата со ретки болести.

Инаку, Општина Охрид и оваа година активно се вклучи и ја поддржа кампањата „Ги запознаваме ретките болести 2021“ со осветлување на општинската зграда во боите на ретките болести. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука