Охрид меѓу градовите каде УЈП спроведе контроли и утврди неправилности за ослободување од ДДВ на основните прехранбени продукти

Скопје/Охрид, 20. март 2022 (ОХРИДПРЕС) – Управата за јавни приходи (УЈП) во текот на изминатите два дена извршила 611 контроли на територијата на цела држава, при што најмногу неправилности утврди кај 114 даночни обврзници од Охрид, Тетово, Струга, Скопје и Прилеп.

Неправилностите се однесуваат на спроведување на одлуката за ослободување од ДДВ на основните прехранбени продукти, согласно Законот за регистриање на готовински плаќања. Во контролите биле опфатени даночни обврзници кои вршат дејност трговија на мало со храна и пијалаци, со месо и производи од месо, со моторни горива, кои дејноста ја вршат преку повеќе деловни единици со поголема продажна површина и остваруват промет во поголем износ.

Директорката на УЈП, Сања Лукаревска, денеска на прес-конференција информира дека и покрај укажувањата имало продажни објекти на кои не им биле прилагодени фискалните апарати и наместо во група Г, лебот, брашното ТИП 400, јајцата, млекото, шеќерот, месото, оризот и маслото за јадење ги продавале во група Б односно со пресметан ДДВ од пет проценти.

– Инспекторите согласно направените контроли најмногу неправилности утврдија кај обврзници од Тетово, Струга, Скопје, Прилеп и Охрид. утврдени се неприлагодени фискални апарати кај трговци на млао со храна и пијалоци, со јајца, со месо и производи од месо во специјализирани продавници. Од 31 контролиран продажен објект во Тетово, кај 15 биле утврдени неправилности и тоа неиздавање и неусогласени фискални сметки. Од 28 контролирани објекти во Струга, кај 12 биле откриени неусогласени фискални сметки. Од 136 исконтролирани продажни објекти во Скопје, само кај 13 е откриена неправилност. Во Прилеп и Охрид од направени 32 контроли, кај 12 биле откриени неправилности. Во Битола од исконтролирани 55 објекти, само 10 имале неправилности во работењето, изјави Лукаревска.

Додаде дека неправилности имало и кај шест продажни објекти во Струмица, Кавадарци, Гостивар и Ресен. Во Неготино неправилно работење е утврдено кај три од вкупно 17 исконтролирани трговци, додека во продажни места од Штип, Гевгелија, Кичево, Велес и Валандово непочитување на одредби од законот е утврдено кај едно продажно место.

Со контролите, кај еден голем трговец кој врши трговија на мало со храна и млечни и месни производи во неколку маркети во Скопје, Струмица, Гевгелија и Валандово е утврдено, потенцира директорката на УЈП, неусогласеност на даночната стапка за месо и други производи.

На територијата на Регионалната дирекција Скопје, од 136 извршени контроли, во 13 се утврдени неправилности, на Регионална дирекција Битола од 120 контроли, во 41 има утврдено неправилност, на Прилеп од 93 контроли, 22 се со утврдена неправилност, на териотијата на Регионална дирекција Струмица од 85 контроли, 10 се со неправилност, на Регионална дирекција Тетово од 78 контроли, 26 се со утврдена неправилност, додека на Регионалната дирекција Штип од 99 само две со утврдена неправилност. (Крај)

извор: Канал 5 фото: Канал 5 видео: МИА

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука