Донев: УЈП ја блокира сметката на Општина Охрид, поранешната директорка на ЈП „Билјанини извори“ 4 години не плаќала данок
Охрид, 22. декември 2022 (ОХРИДПРЕС) – Управата за јавни приходи (УЈП) ја блокира сметката на Општина Охрид, бидејќи поранешната директорка на ЈП „Билјанини извори“, Гордана Јовановска, 4 години не платила ниту денар за данок, обелодени на денешната седница претседателот на Советот на Општина Охрид Сашо Донев.
Тој реагираше на забелешките од советничката од редовите на СДСМ, Живка Ангелоска, дека предлог програмите се разликуват од нацрт програмите, односно средствата се намалени. Донев напомена дека тоа е така затоа што деновиве УЈП ја блокирала сметката на Општина Охрид, затоа што претходната директорка на ЈП „Билјанини извори“, Гордана Јовановска, во периодот од 2017 до 2021 година не исплатила ниту денар за данок кон државата и поради тоа УЈП, наместо „Билјанини извори“, ја блокира Општина Охрид, која е основач на претпријатието, пренесе порталот Охрид 24.
– Знаете дека буџетот се креира за претходните три години во однос на реализацијата и по таа основа Буџетот на Општина Охрид за 2023 година од Министерството за финансии ни го намалија за 32 милиони денари, со кои можевме да направиме неколку капитални инвестиции. Исто така на УЈП после 4 години и текна дека Јавното претпријатие „Билјанини извори“ должи 600.000 евра за неплатен данок. Токму тие пари кои што Ви фалат во нацртите, односно околу 11-12 милиони денари се за ратите кои што ќе треба општината да ги плаќа поради тоа што не бил платен данок од 20 милиони денари во ЈП „Билјанини извори“. УЈП после 4 години се сетила дека „Билјанини извори“ должи 20 милиони денари, кои со каматите се околу 600 илјади евра. Се сетиле дека треба да го блокираат основачот, а не претпријатието, и ние сме соочени со фактот дека во наредните три години ќе треба да исплатиме 600 илјади евра како општина за долгот што го направиле тие што го воделе јавното претпријатие. Ниту денар платен за данок во изминатите 4 години. Директорката имала пари да купува ново службено возило, ама немала пари да го плаќа данокот. Целта е да се блокира Општина Охрид и сите оние средства кои што можеме да ги инвестираме во капитални инвестиции, и дополнително да се блокира сметката, која веќе е блокирана од УЈП. Ние сме приморани како основач на јавното претпријатие да потпишеме договор за исплаќање на рати и тоа ќе ја чини општината околу 200.000 евра годишно. Значи 600 илјади евра ќе треба ние со пари на граѓаните од Општина Охрид, со блокирана сметка, дополнително товар од УЈП, да плаќаме рати за неплатениот данок. Не ми е јасно како 3-4 години на никој од УЈП не му текнало да ја блокира сметката на Општина Охрид, туку чекале да се направи 600 илјади евра главен долг со камата и да ја блокираат после промена на власта, изјави Донев.
Тој изрази надеж дека институциите конечно ќе проработат и ќе се побара одговорност. (Крај)
извор: Охрид 24 фото: ОхридПрес
| @OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука |
