Од Билјанините извори повторно тече вода

Охрид, 27. декември 2022 (ОХРИДПРЕС) – Од Билјанините извори, една од најпрепознатливите локации во Охрид, повторно тече вода. Од крајот на септември од овој препознатлив симбол на Охрид периодично сосема малку или речиси воопшто не истекуваше вода. Сега состојбата е различна. Периодов подобрена е и хидролошката состојба на Охридското Езеро.Според последните достапни податоци за мерењата од 23-ти декември на Управата за хидрометеоролошки работи на Република Македонија (УХМР) водата е на кота од 693,25 м.н.в, што е за 6 сантиметри над просекот за декември(693,19 м.н.в), односно 15 сантиметри над минимално дозволеното ниво (693,10 м.н.в).

Локалитетот „Билјанини извори“ охриѓани често го нарекуваат и душата на градот. Бројни посетители, домашни и странски се определуваат токму за посета на изворите, а локалитетот е една од најголемите препознатливости на древниот град под Самуиловата тврдина. Ова место го користат за да пешачат и да се релаксираат, како и да избегаат од гужвата која владее во центарот на градот. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука