Касарна Хаб ќе организира Саем за сезонско вработување во туристичкиот сектор во Охрид и Струга

Охрид, 9. март 2023 (ОХРИДПРЕС) – Од Касарна Хаб Охрид испраќаат покана до сите средношколци, на возраст над 15 години и студенти кои бараат сезонска работа да го посетат Саемот за сезонско вработување во туристичкиот сектор во Охрид и Струга.

– Ова е фантастична можност да се вработите во некој хотел или ресторан и да стекнете драгоцено искуство во туризмот. Бараме ентузијастички и пријателски настроени луѓе кои сакаат да работаат со туристи од различни култури. Како сезонски вработен, ќе имате можност да работите како угостителски персонал, во ресторан, во кујна, на плажа и слично. Некои од барањата за овие позиции вклучуваат пријателска и позитивна личност, одлични комуникациски вештини. Претходно искуство во туристичката индустрија е плус, но не е задолжително. Потребно е да имате добри комуникациски вештини, познавање на англиски е неопходно за некои позиции и подготвеност да се работа во смени, за викенди, со флексибилно работно време, потенцираат организаторите.

Додаваат дека се нудат конкурентни плати, бакшиши, забавна и динамична работна средина и можност за стекнување многу нови познанства во целиот свет.

– Доколку сте заинтересирани да аплицирате за една од нашите сезонски позиции, ве очекуваме на 24-ти и 25-ти март во Касарна Хаб, во периодот од 12:00 до 18:00 часот. Очекуваме учество на 30-тина туристички и угостителски бизниси од Охрид и Струга. Не ја пропуштајте оваа неверојатна можност да работите во возбудливиот свет на туризмот додека сте на летен распуст, потенцираат од Касарна Хаб. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука