Китески: Повеќе нема да има рекламни билборди на Кеј Македонија

Охрид, 15. март 2023 (ОХРИДПРЕС) – Повеќе нема да има рекламни билборди на Кеј „Македонија“, обелодени последната седница на Советот на Општина Охрид секретарот Александар Китески.

Согласно забелешките на УНЕСКО постоечките ќе бидат отстранети. Инаку до петок треба да се објави оглас за издавање на локации за билборди на подрачјето на општината.

– Се очекува до петок да се објави оглас за нивно издавање. Пред неколку седници донесовме одлука за краткотраен закуп на локации за билборди, со тоа што овој пат, затоа и се одолговлече целата работа, ќе се издаваат и локации за оние мали информативни табли за кои досега не се наплаќаше. Се чека записник за точно да се утврди на кои локации, колку ќе се издадат, рече Китески.

Додаде дека со доаѓањето на градоначалникот Пецаков затекнале состојба со истечени договори за закуп повеќе од осум месеци, по што се започнала нова постапка, согласно Одлуката на Совет за издавање под закуп. (Крај)

извор: ОхридПрес фото: ОхридПрес

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука