Здружението „Бадникови поворки“ го доби највисокото признание „Вељо Манчевски“

Скопје/Охрид, 24. декември 2023 (ОХРИДПРЕС) – Здружението „Бадникови поворки“ го доби највисокото признание „Вељо Манчевски“ за особен придонес во создавањето на трајни вредности“ одлучи Комисијата за односи со верските заедници и религиозни групи и на синоќа одржаниот свечен предновогодишен прием во Македонска филхармонија го врачи високото признание.

– Здружението Бадникови поворки веќе 14 години како народен, духовен и културен проект на граѓаните од православна вероисповед успеа во над 60 населени места ширум Републиката да ја возобнови древната традиција за Бадник да се пеат божиќни каланди, создавајќи празнична и топла атмосфера во радосното исчекување на Христовото Раѓање, со што се постигна највеличествено и највпечатливо прославување на Бадник во поширокиот регион. Благодарение на трудот на Здружението „Бадникови поворки“ кое во своите редови ги вклучи најреномираните македонски пејачи, групи, ансамбли, оркестри, актери, режисери, спортисти и креативци, се создаде трајна вредност на новото време. Ризницата на бадниковите поворки бележи повеќе успешни целовечерни концерти, обновени и извлечени од заборав, но и ново создадени божиќни песни, чија порака е визуелизирана и со моќни видео спотови, организирани се голем број на хуманитарни акции, работилници и допрено е до илјадници луѓе, пружена е рака до секој, за сите да сме заедно, а никој да не е осамен во најубавиот период на годината. Црпејќи го благословот од Македонската православна црква, како и поддршката од епархиите и значајниот поттик од Манастирот Св. Јован Крстител – Бигорски, Бадниковите поворки секоја година храбро исчекоруваат во нови достигнувања кои оставаат длабока трага, посочи Комисијата на синоќешното доделување на признанието.

Од „Бадникови поворки“ потенцираат дека се неизмерно благодарни и радосни што ова признание им пристигнува во момент на интензивни подготовки за овогодинешните Бадникови поворки.

– Чувствуваме должност најсрдечно да им се заблагодариме на сите досегашни учесници, кои во било кој облик дале свој придонес кон Поворките на радоста кои благодарение на големата поддршка од народот, опстојуваат веќе 14 години. Уште еднаш испраќаме повик за учество до сите градови и населени места: на 6 јануари да излеземе на улиците во целата Република и радосно да го најавиме Рождеството Христово, порачуваат од „Бадникови поворки“.

Во насока на негување на традиција на православно празнување на Бадник, со пеење на православни црковни песни, на 6-ти јануари, стотици деца низ охридските улици ќе ја пеат Вечниот Бог.

– Интересот за учество е голем, секоја сабота во спортската сала на ОУ „Христо Узунов“ се одржуваат пробите, вели за Супер радио и OhridPress Летка Филипова, главен координатор на настанот за Охрид и охридско. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука