Избор Македонија Охрид Празници ТОП ВЕСТИ

Обичаи за Младенци: Се оди во домовите на младите брачни двојки, домаќинките месат 40 мали лепчиња, се јадат мед, варени коприви и зелје

Охрид, 22. март 2024 (ОХРИДПРЕС) – Светата Православна црква денеска го празнува споменот на 40-те војници од Севастија кои го дадоа својот живот за верата на Исус.

Во 320 година, 40 војници од еден полк во Севастија одбиле да им принесат жртви на римските идоли и да ги гонат христијаните, по што биле затворени, мачени и осудени да стојат во студена вода.

Од нив се барало да се откажат од Исус, но тие не се поколебале и сите измрзнале со молитва на усните.

Според православниот календар, Младенци е ден на младите брачни двојки, кои се венчале во текот на минатата година.

На овој ден се оди во домовите на младите брачни двојки, а доаѓаат тие што не им биле на свадба. Гостите што одат на Младенци треба да им однесат подароци на младите брачни двојки што ќе може да се користат во домаќинството.

Народот вели дека каков ќе биде денот на Младенци таква ќе биде целата пролет. Овој празник доаѓа по неколкуте големи зимски празници, како што се Божик, Водици, Свети Трифун и се смета за премин кон пролетните празници: Тодорова сабота, Летник, Благовештение, Цветници, Лазарева сабота, Велигден, Ѓурѓовден и други.

Домаќинките на денешен ден треба да покажат дека умеат да дочекаат гости и најчесто замесуваат 40 мали тркалезни лепчиња, во име на светите четириесет севастиски маченици. На Младенци не се препорачува да се јаде тоа што никнало по Нова година, а се смета оти е добро да се јаде мед, варени коприви и зелје за да се прочисти крвта. (Крај)

извор: ОхридПрес фото: архива

@OhridPress - Преземањето на оваа содржина или на делови од неа без непосреден договор со редакцијата на OhridPress значи дека се согласувате со условите за преземање, кои се објавени тука